Një zjarr masiv ka përfshirë këtë të diel zonës ndërmjet fshatrave Vllahat dhe Kostar në Delvinë. Bëhet fjlaë për një pyll me pisha, flakët rrezikuan fillimisht banesat në zonë dhe nisi ndërhyrja me helikopter për shuarjen e zjarrit.
Përgjegjësi i zjarrfikësve në Delvinë, Artur Kseno në një prononcim për mediat theksoi se era e ka komplikuar situatën për vënien nën kontroll të flakëve, ndërsa shtoi se këto zjarre janë krijuar nga dora e njeriut.
Në terren janë 110 forca zjarrfikëse, teksa Kseno u bëri thirrje qytetarëve që të mos ndezin më zjarre.
“Për momentin kemi një vatër shumë të nxehtë në Vllahat, në krahun e majtë tonin siç e shikoni. Në të cilën po ndërhyhet nga ajri me helikopterë, dhe gati gati po vendoset në kontroll gjithë zona e Delvinës. Situata ka shkarë deri në fshatin Kostar, atje ku ka edhe dëme. Era e komplikoi përsëri. E kemi vendosur të gjithën nën kontroll. Për momentin nuk na rrezikohen banesa dhe jetë njerëzish, që është kryesorja për ne. Po vazhdohet me 8 mjete zjarrfikëse, rreth 110 forca zjarrfikëse, operacioni drejtohet direkt nga kryetari i bashkisë Delvinë, sikurse dhe nga Drejtori i Agjencisë Kombëtare të Mbrojtjes Civile. Kemi vetëm një apel, pasi kemi rreth 33 ditë sot që po luftojmë vërtet me zjarret dhe janë zjarre nga dora e njeriut, nuk janë nga pakujdesia. thjesht bëjmë vetëm një thirrje, na ndihmoni dhe ne të bëjmë punën tonë dhe ju të ruani pronën tuaj.” – tha Artur Kseno.
