Policia ka arrestuar dy infermiere lidhur me krimin e rëndë që ndodhi në orët e para të mëngjesit të djeshëm në në azil privat. Në atë godinë, rreth orës 04:00 të mëngjesit 78-vjeçari Zyhdi Shehu ka goditur disa herë me bastun (shkop hekuri) 82-vjeçarin Virxhil Vesho, duke i shkaktuar atij vdekjen e menjëhershme.
Dy infermieret e arrestuara, G. S., 26 vjeçe, dhe N. M., 31 vjeçe, nuk kanë njoftuar organet kompetente për ngjarjen e ndodhur si dhe kanë kryer veprime që pengojnë zbulimin e së vërtetës.
“Në lidhje me ngjarjen e ndodhur ditën e djeshme, më datë 08.08.2024, ndodhur në një azil privat për të moshuarit, ku shtetasi Z. Sh., 78 vjeç, ka goditur me bastun shtetasin V. V., i cili si pasojë e dëmtimeve të marra ka humbur jetën, ju informojmë se:
Në vijim të veprimeve hetimore të thelluara të kryera u arrestuan shtetaset G. S., 26 vjeçe, dhe N. M., 31 vjeçe, të dyja banuese në Tiranë, me profesion infermiere në azilin ku akomodoheshin dy të moshuarit.
Nga hetimi i kryer u siguruan prova të mjaftueshme që krijojnë dyshimin e arsyeshëm se dy të arrestuarat në bashkëpunim me njëra-tjetrën, kanë konsumuar veprën penale “Veprime që pengojnë zbulimin e së vërtetës”, parashikuar nga neni 301/25 i Kodit Penal.
Këto dy shtetase nuk kanë njoftuar organet kompetente për ngjarjen e ndodhur si dhe kanë kryer veprime që pengojnë zbulimin e së vërtetës.“- njofton policia.
Materialet i kaluan Prokurorisë.
