Mundësi çeçen Zelimkhan Abakarov që përfaqëson Shqipërinë në Lojërat Olimpike “Paris 2024” është eliminuar në çerekfinalen e stilit të lirë deri në 57 kg. Ai u mposht nga mundësi nga India, Aman Sehraawat me rezultatin 12-0, duke shuar kështu ëndrrën e shqiptarëve për një medalje prej tij.
Më herët gjatë ditës së sotme, Abakarov mposhti në fazën e 1/8 me përmbysje 6-7 mundësin Iuna Fafe Diamantino, rivalin nga Guinea-Bissau. Raundi i parë foli për afrikanin, që e dërgoi rezultatin deri në 5-0, para se Abakarov të reagonte dhe në raundin e dytë të kthente gjithçka në favor të tij, me rezultatin 6-7.
Në çerekfinale, Abakarov nuk pati mundësi dhe humbi 12-0 nga një rival që mund të jetë edhe kampion Olimpik në këtë peshë. Në periodën e parë Aman Sehraawat fitoi 3-0, ndërsa në raundin e dytë përfaqësuesi i Shqipërisë nuk pati shanse dhe pësoi kundër edhe nëntë pikë të tjera.
Së bashku me Abakarov, janë edhe 6 sportistë të tjerë kuqezi që përfaqësonin Shqipërinë në Lojërat Olimpike “Paris 2024” dhe që i kanë mbyllur konkurrimet e tyre duke u eliminuar pa medalje.
Tashmë shpresat e fundit për medalje për Shqipërinë janë dy mundësit e tjerë, Dudaev dhe Valiev, të cilët do të konkurrojnë në datat 9 dhe 10 gusht.
Nesër do ta ketë radhën Chermen Valiev në peshat 74 kg, ndërsa mundësi i fundit i ekipit olimpik të Shqipërisë që do të konkurrojë në “Paris 2024” do të jetë kampioni i Europës, Islam Dudaev, të shtunën në peshat 65 kg.
Për t’u theksuar se në dhjetë turnetë e Lojërave Olimpike që Shqipëria ka marrë pjesë, nuk ka mundur të sigurojë asnjë medalje.
