Media greke “Protothema” ka publikuar pamjet e atentatit mafioz të regjistruar më 2 Korrik, ku u ekzekutua topografi grek Panagiotis Stathis brenda makinës së tij në Neo Psychiko.
Në videon e mëposhtme, autori i krimit është me motor, i cili shfaqet i veshur me rroba të zeza dhe me një skafandër të bardhë në kokë. Ai afrohet tek makina e biznesmenit nxjerr armën dhe qëllon në drejtim të 54-vjeçarit përmes xhamit të shoferit.
Pas të shtënave të para, atentatori e mbush sërish karikatorin dhe vijon të qëllojë drejt biznesmenit, duke u siguruar që ai kishte ndërruar jetë. Më pas, largohet nga vendi i ngjarjes.
Autoritetet greke kanë arrestuar një 44-vjeçar si autor të dyshuar të krimit, megjithatë, ai ka mohuar akuzat.
Policia ka zbuluar se i dyshuari kishte bërë kërkime të detajuara rreth jetës së viktimës. Autori raportohet se ka kërkuar në lidhje me vendbanimin e Stathis, nëse do të shpërngulej dhe ku (në atë kohë thuhej se kishte ndërruar shtëpinë). Ndërsa dyshohet se po kërkonte edhe adresën e saktë të kompanisë së viktimës.
Në të njëjtën kohë, sipas të njëjtave burime, në celularin e të arrestuarit dyshohet se është gjetur një fotografi me armë, që ngjan me atë të përdorur në krim.
Gjithashtu një nga celularët e 44-vjeçarit është gjetur një foto e Panagiotis Stathis, që dyshohet se është bërë nga vetë autori i dyshuar pas një takimi që ka pasur me një biznesmen në Mykonos.
Hetimet e policisë greke për vrasjen e biznesmenit Panagiotis Stathis kanë zbuluar një lidhje të mundshme me një tjetër krim të rëndë, vrasjen e shqiptarit, Alfons Ndoci.
Të dyja viktimat, Stathis dhe Ndoci, duket se kanë pasur bashkëpunime në disa “punë”. Alfons Ndoci ishte akuzuar më parë se ishte përdorur nga biznesmenë të ndryshëm për të kryer veprime kriminale, për shkak të konflikteve pronësore në Mykonos.
35-vjeçari Alfon Ndoci u vra me thikë mesditën e 26 Qershorit në sektorin numër 4 të burgut të Koridhalos, ku qëndroheshin të dënuarit për vepra të rënda penale. Në atë ngjarje mbeti i plagosur dhe Vokrri 46 vjeç nga Gjakova e Kosovës, teksa dyshohet se krimi ka ardhur pas një përleshje mes shqiptarëve.
Në pamjet e publikuara më herët nga mediat greke në lidhje me këtë ngjarje, shihej se dy të burgosurit, Julian Halili dhe Etem Hoxha, dalin nga zyra e gardianit Lambropulos të armatosur me thika dhe shkojnë e sulmojnë Ndocin.
Juliano Halili, i dënuar me burgim të përjetshëm për vrasjen e dy shqiptarëve babë e bir, ka marrë përsipër autorësinë e vrasjes dhe plagosjes së ndodhur në burgun e Koridhalos.
Ndoci konsiderohet një person me rrezikshmëri të lartë. Në vitin 2014 gjatë një grabitjeje në një dyqan në Elefsina vrau pronarin, të cilin e ekzekutoi me gjakftohtësi sepse thjesht guxoi të rezistonte gjatë grabitjes. Në vitin 2018, gjatë transferimit në Kretë, ai arriti të arratisej.
Gjithashtu, në qershor të vitit 2023 Ndoci u arrestua së bashku me shtetasin Gerald Jaho, pasi u kapën me 2 pistoleta, marijuanë, 16 mijë e 207 euro dhe kartmonedha të tjera të shteteve të ndryshme, gjatë një ndjekjeje policore në Athinë. Ata ishin pikasur në një qendër tregtare nga biznesmeni Tonin Preka, i cili i kishte identifikuar si personat që i kishin grabitur 40 mijë euro në Mykonos. Policia mbërriti në vendngjarje dhe kreu një ndjekje episodike të tyre, ku Ndoci hipi në një automjet për të shpëtuar dhe përplasi disa mjete deri sa u kap.
Ndaj Ndocit kishte ndërkohë urdhër arreste në fuqi për “grabitje në bashkëpunim” dhe dy dënime me në total 3 vjet burg për “armëmbajtje nga një i burgosur” dhe “vjedhje”.
