Policia e Shtetit ka bërë me dije se është lokalizuar dhe arrestuar në Gjermani një shtetas i shpallur në kërkim ndërkombëtar nga drejtësia shqiptare.
Në kuadër të operacionit policor të koduar “Partners” është vënë në pranga shtetasi kosovar Fadil Ibishi, 62 vjeç.
Sipas autoritetefve policore, ky shtetas ishte shpallur në kërkim ndërkombëtar nga Interpol Tirana, pasi Gjykata e Durrësit, me vendimin e datës 3 Shkurt 2022, i ka caktuar masen e sigurisë “Arrest në burg”, për veprat penale “Kanosja”, “Shtrëngimi me anë të kanosjes ose dhunës për dhënien e pasurisë” dhe “Ngacmimi seksual”.
Raportohet se Fadil Ibishi dyshohet se ka kanosur një shtetase, për dhënien e 5 mijë eurove, që të mos publikonte video intime të saj. Gjithashtu, ai dyshohet se ka ngacmuar seksualisht mbesën e kësaj shtetaseje.
Sipas autoriteteve, kapja e këtij shtetasi ishte rezultat i informacionit të siguruar nga Policia shqiptare dhe i shkëmbimit të tij me homologët gjermanë.
Interpol Tirana dhe Interpol Wiesbaden po kryejnë procedurat për ekstradimin e 62-vjeçarit në Shqipëri.
