Shëngjin është duke u përballur me një situatë të vështirë për shkak të zjarreve që kanë pushtuar zonën.
Situata me zjarrin arriti pikën kritike mesditën e sotme kur iu afrua dhe rrethoi një resort turistik, aty ku edhe u dogjën 2 beach-bare në plazh.
Era e fortë dhe flakët përparuan me shpejtësi duke sjellë urdhrat për evakuimin e plotë të pushuesve, por edhe banorëve nga zona.
Momenti më dramatik ishte edhe ai i regjistruar në Ranën e Hedhun. Flakët e favorizuara nga era dhe bimësia u përhapën me aq shpejtësi sa kapën në befasi zjarrfikësit. Po në këtë zonë mori flakë edhe çatia e një banese disa katëshe.
Flakët i janë afruar edhe kishës së Shëngjinit.
Në terren kanë zbritur një numër i lartë zjarrfikësesh, teksa po mundohen që të mbajnë flakën nën kontroll për të mos rrezikuar qytetin.
Ndërkohë pak minuta më parë këtyre pjekjeve u është bashkuar edhe ushtria, me mjete dhe me forca njerëzore, në mënyrë që të përballen me flakët gjatë natës.
Nga ana tjetër në zonë OSSH ka shkëputur edhe energjinë elektrike, për të shmangur ndonjë incident që mundtë krijojë vatra të reja.
