Analisti Andi Bushati, i ftuar në emisionin “Të Paekspozuarit”, tha se ndryshimet që bëri kryeministri Edi Rama në qeveri, duke larguar disa ministra dhe duke i zëvendësuar ata kryesisht me figura të panjohura politike, nuk ndryshojnë ndonjë gjë në qeveri.
Analisti shtoi se qeveria është një “klub privat” ku kryeministri i cakton ministrat edhe duke mos e ditur ata vetë, madje mund t’i shkojë ti marrë nga krevati.
“Për qeverinë, hiq disa, vendos disa, ikin anonimë, vijnë anonimë, nuk ndryshon asgjë. Nëse do të përpiqeshim në këtë ambjent anormal, të flisnin normalisht… Pse iku Balla? Çfarë bëri gabim? Pse iku ministri i Financave, pas 8 muajsh? Çfarë përfaqësonin këta që erdhën? Çfarë suksesesh kanë? Pse duhen promovuar?
Këtu është bërë si klub privat qeveria. Nuk ka kuptim të analizosh dhe komentosh, kur je i zhveshur nga çdo e dhënë. Sot Edi Rama mund të vijë të të marrë nga krevati dhe të bën ministre. Pastaj duket sikur hedh fall të diskutosh nga këto gjëra. Publiku është përjashtuar nga vendimarrja.”, tha Bushati.
