Gjykata e Apelit ka dhënë vendimin për dy të akuzuarit për vrasjen e Kleo Gërdhuqi në vitin 2007, i cili u ekzekutua me armë zjarri në stanin e tij në në fshatin Bestrovë pas një sherri për kullotat.
Apeli ka dënuar me nga 18 vite burg secilin, si Viktor Omerin dhe shokun e tij me inicialet F. T. Ata janë shpallur fajtor për kryerjen e veprës penale të “Mbajtja pa leje të armëve luftarake” dhe të “Vrasje me paramendim”, kryer në bashkëpunim.
Me këtë dënim, Apeli ka prishur vendimin e Gjykatës së Shkallës së Parë të Vlorës, e cila e kishte dënuar shtetasin F.T. me 17 vite burgim. Vendimi është marrë nga trupa gjykuese me relator gjyqtarin Genti Dokollari dhe anëtarë gjyqtarët Irena Brahimi dhe Fuat Vjerdha.
Viktor Omeri u arrestua në vitin 2014, në saj të operacionit të koduar “Antena”, pas 7 vitesh në kërkim.
Si ndodhi vrasja?
Në 9 gusht 2007, në fshatin Bestrov të Vlorës, rreth orës 08:30, Kleo Gërdhuqi u vra me armë zjarri në afërsi të stanit të tij, në vendin e quajtur “Moçale”. Viktima ishte pronar i një kullote ngjitur me atë të Viktor Omerit dhe një bashkëpronari tjetër, të cilët kishin punësuar një bari për të ruajtur tufën e tyre të bagëtive.
Ditën e ngjarjes, vëllai i Kleos pa bagëtitë e të vëllait të pa shoqëruara në rrugën kryesore. Kjo e bëri atë të shkojë drejt vendit ku qëndronte Kleo, duke e gjetur të vrarë pranë stanit të tij.
Hetimet zbuluan se Kleo Gërdhuqi kishte marrë tetë plagë me armë zjarri në kokë, kraharor, bark dhe gjymtyrë, që shkaktuan hemorragji të rëndë dhe më pas vdekjen. Policia zbuloi se viktima kishte pasur një konflikt të mëparshëm me Viktor Omerin për shkak të kalimit të bagëtive në kullotën e tij. Këto debate ndodhën disa ditë para vrasjes së Kleos.
