Zjarret prej disa javësh vazhdojnë të djegin me qindra hektarë me pyje, kullota, vreshtari e në disa raste edhe shtëpi nga jugu e deri në veri të Shqipërisë.
Vetëm pasditen e sotme, 27 korrik, janë shënuar 4 vatra të reja zjarri, konkretisht në Kukës, Shëngjin, Mirditë e Konispol.
Pak kohë më parë, VOA evidentoi në një artikull se kapacitetet e Shqipërisë për shuarjen e zjarreve në sipërfaqet pyjore, sidomos në zonat e thella malore, janë të kufizuara. Shërbimi zjarrfikës ka vetëm 147 automjete zjarrfikëse, pjesa më e madhe të vjetruara, dhe rreth 1300 punonjës, por asnjë avion zjarrfikës.
Këtë e fakton edhe zjarri i pasdites së sotme në Konsipol ku për të shuarflakët është vepruar me mjete rrethanore dhe me pompa shpine me ujë pasi forcat zjarrfikëse nuk kanë kapacitet e duhura për terrene të vështira. Kjo bën që përmasat e zjarrit të zgjerohen frikshëm. Ndërkohë Ministri i Mbrojtjes, Niko Peleshi, deklaron me krenari ditë pas dite se si po bëjnë një punë të shkëlqyer.
Deputeti Agron Gjekmarkaj, teksa shpërndau pamje nga zjarri në Shëngjin, tha se mosveprimi i autoriteteve po shndërrohet në krim mjedisor dhe i bëri thirrje Kryeministrit Edi Rama dhe ministrit të mbrojtjes Niko Peleshi t’i përgjigjen apelit për të ndërhyrë ushtria dhe çdo institucion që mund të jetë i dobishëm.
Kujtojmë se çdo vit regjistrohen më shumë se 200 vatra zjarri në pyje dhe kullota, duke i sjellë një dëm të konsiderueshëm ekonomisë së vendit dhe mjedisit natyror.
- Zjarri në Kukës, shpërthejnë minat luftarake
Në fshatin Peraj të Hasit, pranë kufirit me Gjakovën, zjarri ka shpërthyer disa mina luftarake, prezenca e të cilave mendohet të jetë që prej luftës në Kosovë në vitin 1999.
Për shkak të kësaj situate, punonjësit e shërbimeve zjarrfikëse kanë ndërprerë punën, duke ia lënë vendin forcave ushtarake që do të monitorojnë situatën në mënyrë të specializuar.
Ai deklaron më tej se mosveprimi po shndërrohet në krim mjedisor dhe i bëri thirrje Kryeministrit Edi Rama dhe ministrit të mbrojtjes Niko Peleshi t’i përgjigjen apelit për të ndërhyrë ushtria dhe çdo institucion që mund të jetë i dobishëm.
“Zjarri në Malin e Rrencit e të Shëngjinit po merr përmasa dramatike. Flakët dhe tymi janë kudo rreth qytetit si rrezik real i çastit por edhe pak më afatgjatë për shëndetin!
Deri tani përpjekjet për ta shuar kanë qenë modeste. Duhet ndërhyrje urgjente jo vetëm nga pushteti lokal por nga qeveria qendrore me çdo mjet, mundësisht me helikopter nga ajri.
Nuk ka më kohë për propagandë. Mosveprimi po shndërrohet në krim mjedisor , në rrezik për jetën e pronat në kulmin e sezonit turistik. I bëj thirrje Kryeministrit Edi Rama , ministrit të mbrojtjes Niko Peleshi t’i përgjigjen apelit për të ndërhyrë ushtria dhe çdo institucion që mund të jetë i dobishëm. Nuk duhen fjalë dhe mbi të gjitha jo gënjeshtra por lëvizje menjëhere e Qeverise dhe Shtetit nëse kemi ënde të tilla në të vërtetë e jo në sporte propogande.
Shtëllungat e tymit kanë zëvendesuar retë ! Banoret po thithin tym. Zjarri nuk po djeg vetëm pemë e shkurre por edhe seriozitetin e emergjencave civile dhe gadishmërinë për të reaguar. Nesër do jetë vonë. Sonte duhet bërë diçka. Afër portit punë orësh po afrohet një vatër e re zjarri. Pasojat merren me mend!”- shkruan Gjekmarkaj.
- Zjarri në Mirditë shkrumbon dy banesa
Një zjarr masiv raportohet se ka rënë në Kodër Rrëshen ku flakët kanë djegur dy banesa, ndërsa rrezikohen edhe disa të tjera. Gjithashtu është djegur edhe një sipërfaqe e madhe vreshtari.
- Përfshihet nga flakët mali në Konispol
Flakët kanë përfshirë një pjesë të malit të Saraqindit, duke përfshirë zonën e Shalës-Dishat- Markat, të bashkisë së Konispolit.
Në vendngjarje ndodhen shërbimet zjarrfikëse të Konispolit, Sarandës dhe Finiqit.
Për shkak të terrenit të vështirë për të shuar zjarrin është vepruar me mjete rrethanore dhe me pompa shpine me ujë.
- Vlora e mbuluar nga tymi helmues
Ndërkohë, fusha e mbetjeve në Vlorë po digjet për të katërtin vit radhazi, ndërsa autoritetet nuk kanë ende një zgjidhje për menaxhimin e mbetjeve dhe po i lënë banorët dhe turistët në mëshirë të tymit helmues.
