Një Nani edhe për Dinamon. Edhe ai është portugez dhe luan në sulm, por sigurisht që nuk është i famshmi Luis Karlos Almeida da Kunja, i njohur në gjithë botën si Nani, ish-lojtari i Manchester United dhe Portugalisë.
Nani i Dinamos, edhe pse jo ende zyrtarisht, është 26 vjeç dhe ka ardhur për provë te blutë, pasi ka luajtur në disa ekipe të kategorive të ulëta në Greqi, si Kallmata dhe Olimpiakos Vollos.
Luan në të dy krahët e sulmit dhe gjatë kësaj jave stërvitore ka treguar një nivel të kënaqshëm. Përveç 3 golave të shënuar në miqësoren e së mërkurës kundër një ekipi diletant italian, Nani ka dhënë edhe në stërvitje sinjale pozitive për stafin teknik të kryeqytetasve.
Nga lojtarët që janë në provë ai ka bindur më shumë dhe gjasat janë që ditët në vazhdim të ketë një zyrtarizim të portugezit si pjesë e Dinamos së sezonit të ri.
