Armando Broja është në udhëkryq për sa i përket të ardhmes gjatë merkatos së kësaj vere.
Në përfundim të sezonit të kaluar largimi i tij nga Chelsea jepej i sigurt nga mediat angleze, por grumbullimi i futbollistit shqiptar nga trajneri i bluve Enzo Maresca në turneun para sezonal në SHBA, është një sinjal se Broja mund të fitojë kuota për të qëndruar.
Sulmuesi i kombëtares u hodh në fushë në pjesën e dytë në miqësoren e bluve me Wrexham në miqësoren e luajtur në Santa Clara të Kalifornisë, me Brojën që la shenjën e tij në këtë takim.
22-vjeçari në minutën e 82 mori një top në zonë, e mbrojti mirë mes dy kundërshtarëve duke zgjedhur në vend të një iniciative personale një pasim për shokun e skuadrës Ugochukwu që nuk mund të gabonte për golin e 2-2, që ishte dhe rezultati final i takimit.
Gjatë javëve të fundit, emri i tij është përmendur në lidhje me disa skuadra duke nisur nga Milani në Serie A, finalistët e Champions League Borussia Dortmund si dhe disa skuadra të Premier League.
