Banorët e Thumanës, Krujës dhe Fushë-Krujës dolën pasditen e kësaj të mërkure në protestë, duke bllokuar aksin Thumanë-Kashar për rreth 30 minuta të dyja krahët e autostradës.
Ata pretendojnë se nuk kanë hyrje-dalje në autostradë dhe se për të hyrë në këtë aks rrugor, sipas tyre ata do të duhet të shkojnë deri në Rinas. Gjithashtu, ata pretendojnë se edhe bizneset janë duke u falimentuar, pasi automjetet nuk kanë më rrugë për të kaluar aty.
Forca të shumta policie ishin të pranishme për mbarëvajtjen e sigurisë, të cilat u përplasën dhunshëm me protestuesit. Siç shihet edhe në videon e mëposhtme, në një moment, protestuesit arritën të çanin koordonin e Policisë, duke u futur në autostradë dhe e bllokuan për rreth 30 minuta.
Efektivët e Policisë hodhën gaz lotsjellës drejt protestuesve për t’i shpërndarë ata dhe për të zhbllokuar lëvizjen e automjeteve në autostradë.
Protestuesit paralajmëruan se do të dalin sërish në protestë.
