Teuta ka lënë përkohësisht qytetin e Durrësit për të vazhduar fazën përgatitore në Pukë në prag të startit të kampionatit më 18 gusht.
Pasditen e djeshme durrsakët kanë kryer stërvitjen e parë në stadiumin “Ismail Xhemali” të Pukës.
Gjatë kësaj periudhe ekipi do të zhvillojë edhe disa ndeshje miqësore, ku Edi Martini do të ketë mundësinë të shikojë gjendjen e të gjithë futbollistëve.
Gjithashtu gjatë qëndrimit 2 javor në Pukë nuk përjashtohen as afrimet e mundshme, teksa klubi dëshiron të mbulojë të gjitha repartet në mënyrë, që ekipi të jetë gati për fillimin e sezonit.
Dje ekipi nisi grumbullimin në hotelin në qendër të Pukës në orën 12:30 dhe të gjithë lojtarët, me programin e bërë nga Martini, janë të detyruar të mbajnë një regjim të hekurt. Klima e mirë me temperatura më të ulëta se në Durrës, i krijon kushte të favorshme pune skuadrës në këtë periudhë të nxehtë.
Në seancën e djeshme, fillimisht skuadra ka zhvilluar ushtrime të ndryshme me përgattësit atletik dhe më pas gjithçka është zhvendosur në punën me top.
Aspekti tekniko-taktik dhe mbi të gjitha ushtrime të ndryshme në veprimet ofensive dhe defensive, kanë qenë në fokusin e Martinit në ditën e parë.
