Ministrja e Drejtësisë, Albulena Haxhiu, është intervistuar nga Prokuroria Speciale e Republikës së Kosovës.
Haxhiu është ftuar për të sqaruar deklaratat e saj dhënë në televizionin “Dukagjini” lidhur me takimet dhe diskutimet e mundshme me prokurorë dhe gjyqtarë për raste të caktuara.
Gjatë emisionit, Haxhiu kishte thënë se prokurorë e gjyqtarë i kanë çuar fjalë për kafe “për tu marr vesh për çështje të caktuara” por që ajo nuk kishte pranuar.
Gjithashtu, Haxhiu është pyetur rreth postimit të saj në rrjetin social Facebook të datës 20 Korrik 2024, lidhur me arratisjet që kanë ndodhur nga burgjet e Kosovës.
Haxhiu pati shkruar se kishte informata nga institucionet e sigurisë se disa arratisje që kishin ndodhur së fundmi në Kosovë, përfshirë edhe Faton Hajrizin ishin nxitur, organizuar, bashkëorganizuar e lehtësuar nga grupe kriminale të lidhura me struktura të pushtetit në territorin e Serbisë.
Intervistimi i Haxhiut për sqarim të këtyre çështjeve do të vazhdojë edhe nesër.
