Deputeti Lulzim Basha i është përgjigjur kreut të Partisë së Lirisë, Ilir Meta, i cili gjatë një konference me gazetarët e konsideroi atë si përgjegjës për vrasjet në bulevard në demonstratën e “21 Janarit” për shkak se në atë kohë mbante postin e Ministrit të Brendshëm.
Basha ka postuar një video në rrjetet sociale, ku shfaqen Ilir Meta dhe Sali Berisha duke u përplasur me njëri-tjetrin, gjatë kohës që kreu i Partisë së Lirisë mbante postin e kreut të Parlamentit dhe ishte në krah të socialistëve.
Basha e konsideron Metën si simbol të pandëshkueshmërisë dhe t pazareve në kurriz të shqiptarëve dhe demokratëve. Sipas Bashës, pazaret, deliret dhe ankthet e Metës kanë dëmtuar rëndë opozitën, ndërsa distancimi nga ai dhe të ngjashmit e tij janë kusht i pashmangshëm për fitoren e saj.
Ish-kryedemokrati shkruan se i njëjti person që sot bën sikur mbron Sali Berishën, ka bërë akuza nga më monstruozet ndaj tij edhe në këtë rast. Sipas tij, drejtësia ka shumë për të zbardhur për 21 janarin, nga Ilir Meta, njeriu me bllok, te Edi Rama, organizatori i protestës me sebepin e bllokut.
Reagimi i plotë:
Drejtësia ka shumë për të zbardhur për 21 janarin. Nga Ilir Meta, njeriu me bllok, te Edi Rama, organizatori i protestës me sebepin e bllokut, i cili më pas çuditërisht e bëri Ilir Metën pjesë të pushtetit dhe ata që i akuzonte si pjesë e grupit të zjarrit i emëroi kryetar të PS dhe të Bashkisë. E më pas e gjithë e vërteta deri në fund.
Mashtrimet ordinere dhe zig-zaget e përditshme nuk mund t’i fshehin faktet të cilat janë para syve të çdo shqiptari. I njëjti person që sot bën sikur mbron Sali Berishën, ka bërë akuza nga më monstruozet ndaj tij edhe në këtë rast.
Ilir Meta është simbol i pandëshkueshmërisë dhe i pazareve në kurriz të shqiptarëve dhe demokratëve. Pazaret, deliret dhe ankthet e tij kanë dëmtuar rëndë opozitën, ndërsa distancimi nga ai dhe të ngjashmit e tij janë kusht i pashmangshëm për fitoren e saj.
