Mbledhja e sotme e Këshillit Bashkiak të Tiranës u kthye në një “arenë boksi”, pasi Halit Valteri u hodh në mbrojtje të shefit të tij, kryebashkiakut Erion Veliaj.
Fillimisht ishte këshilltari i opozitës, Tedi Blushi, i cili i hodhi disa letra kreut të Bashkisë së Tiranës, Erion Veliaj, gjatë momentit që po fliste ky i fundit. Ky moment i Blushit erdhi pasi Veliaj po i drejtohej me fjalët “më ngatërron me atë të Bllokut”, teksa pas veprimit të Blushit e konsideroi edhe si “i pa aftë”.
Pas këtij veprimi nga ana e Blushit, reagoi Halit Valteri, i cili u ngrit në mbrojtje të Veliajt, duke shtyrë këshilltarin e opozitës. Pas këtij momenti, ata janë përfshirë në një përleshje fizike, ku nuk kanë munguar as grushtet, siç shihet edhe në foton e mësipërme.
Të dy pretendojnë për dhunë fizike ndaj njëri-tjetrit, por vetëm këshilltari socialist, Halit Valterika depozituar në Policinë e Tiranës një kallëzim penal, ku pretendon se është goditur me grushte dhe sende të forta nga Tedi Blushi.
Ky i fundit është marrë në pyetje, për të dhënë sqarime ne lidhje me incidentin që shoqëroi mbledhjen e këshillit bashkiak.
