Kreu i PD-së, Sali Berisha ka reaguar në lidhje me atentatin mafioz të regjistruar mesnatën e kaluar në Memaliaj, ku u ekzekutuan tre persona, dy prej të cilëve ishin aksidentalë, ndërsa një tjetër mbeti i plagosur.
Teksa u shpreh ngushëllime familjarëve, Berisha në një postim në rrjetet sociale dënon me forcën më të madhe aktin e shëmtuar kriminal dhe mungesën e madhe të sigurisë. Sipas liderit demokrat, tashmë rendi është në duart e zeza të krimit dhe duart e Taulantit me tre mbiemra, duke iu referuar ministrit të Brendshëm.
Postimi i plotë:
“Rendi në duart e zeza të krimit, duart e Taulantit me tre mbiemra.
Memaliaj mbrëmë u përgjak dhe terrorizua. Tre qytetarë u ekzekutuan dhe një u plagos me breshëri kallashnikov në qendër të qytetit. Dy nga viktimat nuk kishin asnjë lidhje me ngjarjen, njeri ishte kamarier, tjetri klient në lokalin e masakrës.
Si zakonisht vrasësit u larguan në drejtim të paditur dhe po si zakonisht dogjën makinën dhe armët e krimit.
Shpreh ngushëllimet e mia familjeve të viktimave të këtij akti kriminal të shëmtuar dhe dënoj me forcën më të madhe aktin e shëmtuar kriminal, mungesën e madhe të sigurisë mbasi rendin tashmë është në duart e zeza të krimit dhe Taulantit të krimit.”
Shënjestër e atentatit të kaluar në Memaliaj ishte 74-vjeçari Shyqyri (Shyqo) Kalemi, i cili humbi jetën pas breshërisë së kallashnikovit, ndërsa mbeti i plagosur dhe vëllai i tij, Artur Kalemi 57 vjeç, i cili ishte ulur në të njëjtën tavolinë me viktimën në lokal.
Si pasojë e të shtënave me breshëri të kallashnikovit humbi jetën aksidentalisht dhe kamarieri i lokalit, 36-vjeçari Gledio Muka, si dhe 47-vjeçari Marsel Çela, i cili ishte klient në lokal.
Shyqyri Kalemi është babai i Andrea alias Adriatik Kalemi dhe Zamir Kalemit të cilit iu kanë shpëtuar tre atentateve të mëparshme. Ndërsa Artur Kalemi është xhaxhai i tyre. Një prej pistave ku po heton Policia është hakmarrja ndaj Andrea (Adriatik) Kalemit.
