Një i ri nga Tirana është plagosur nga helika e skafit që kishte marrë me qira në Sarandë. Mësohet se ngjarja ka ndodhur ditën e djeshme rreth orës 14:23, teksa i plagosuri është shtetasi me inicialet A. T., 28 vjeç, banues në Tiranë.
Autoritetet policore raportojnë se pas telefonatës për ndihmë në Sallën Operative, ka qenë skafi i Komisariatit të Policisë Kufitare Sarandë, që ka gjetur të dëmtuarin në afërsi të Kepit të Qefalit dhe e ka imbarkuar.
Pasi është sjellë me urgjencë në Portin e Sarandës, ai është transportuar me ambulancë drejt spitalit të Sarandës, ku ka marrë ndihmën e parë dhe ndodhet jashtë rrezikut për jetën.
Mjetin lundrues i riu nga Tirana e kishte marrë me qira në afërsi të plazhit të Lukovës.
