Xherdan Shaqiri i ka dhënë fund karrierës te Zvicra në moshën 32-vjeçare pas 125 ndeshjeve të luajtura me ekipin e parë dhe 32 golave të shënuar.
“Shtatë turne, shumë gola, 14 vite me kombëtaren e Zvicrës dhe momente të paharrueshme. Është koha për t’i thënë lamtumirën kombëtares. Mbeten kujtime të mëdha dhe për këtë ju them të gjithëve: FALEMINDERIT”, shkruan Shaqiri në rrjetet sociale.
Në karrierën e tij, ish-lojtari i Basel, Inter, Bayern Munich, Lyon apo Liverpool ka veshur 125 herë fanellën e kombëtares zvicerane, gjë që e bën atë lojtarin e dytë më të përzgjedhur në historinë e helvetëve, pas Granit Xhakës (130 ndeshje).
Që nga paraqitja e tij e parë më 3 mars 2010 kundër Uruguait, Shaqiri ka shënuar gjithsej 32 gola me fanellën e Zvicrës. Disa prej të cilëve spektakolarë dhe vendimtarë në Europiane dhe Botërore.
Aktualisht Shaqiri luan me Chicago Fire në SHBA.
View this post on Instagram
