Deputeti i Partisë Demokratike, Luan Baçi ka dalë kundër deklaratave të kreut të grupit parlamentar, Gazment Bardhi, se kandidat për kryeministër i opozitës mund të jetë një figurë tjetër dhe jo kreu i partisë, Sali Berisha.
Në një intervistë televizive, Baçi tha se nuk e vendos Gazment Bardhi e se deklarata të tilla nga drejtues të lartë në PD janë për të ardhur keq, kjo pasi partia ka një statut. Sipas statutit, tha Baçi, kryetari i partisë do të jetë edhe kryeministër e në rastin konkret është Sali Berisha.
“Janë të pavlera deklarata e tyre. PD ka një statut dhe parashikon të gjitha zgjidhjet që ka PD. Nuk do të dakordësohesha me propozimin se kryeministri do të zgjidhet pas zgjedhjeve duke e kaluar në votë. Kryetari i partisë është kryeministër dhe për mua ashtu siç është kryetar Berisha do të jetë edhe kryeministër. Më vjen keq kur bëhet nga drejtues të PD-së deklarata të tilla. Nuk është në dorë të zotit Bardhi. PD ka një statut për mua këto diskutime nuk duhet të bëhen fare. Berisha kur është pyetur do të zgjidhet nga anëtarësia. Ky është një propozim që duhet të miratohet në Këshillin Kombëtar… sot që flasim ka një dhe është drejtuesi i PD-së do të jetë dhe kryeministri i vendit.”– tha Baçi.
