Pjesa më e madhe e aleatëve të Sali Berishës ndodhen mbrëmjen e kësaj të enjteje në Bulevard duke protestuar, bashkë me Ilir Metën dhe figura të tjera të Partisë së Lirisë.
Një prej aleatëve, kreu i Partisë Republikane, Fatmir Mediu, është shprehur përmediat se opozita ka dalë sot në protestë jo vetëm për kauzën e saj, por për kauzën e shqiptarëve.
“Nuk është kauzë e opozitës, është kauzë e shqiptarëve. Jetojmë në një qeverisje që nuk njeh as kushtetutë e as ligj. Qytetarëve shqiptarë u mohohet mundësia për të votuar si njerëz të lirë. Ekonomia po shkon drejt rrënimit. Largimi i të rinjve një plagë. Mazhoranca ka një arrogancë në sjelljen e saj…”
I pyetur nëse beson se kryeministri Edi Rama, do t’ua garantojë qeverinë teknike që opozita kërkon, Mediu tha se detyra e opozitës është që të ngrejë shoqërinë në protesta si kjo e sotmja, dhe t’ua bëjë të qartë edhe ndërkombëtarëve se vendit i duhet një qeveri teknike që të bëjë gati zgjedhjet.
Sa i përket situatës brenda vetë opozitës, Mediu tha se kjo e fundit udhëhiqet me shqiptarë dhe se duhet kontributi i të gjithëve.
“Detyra si e Berishës dhe të tjerëve është që të jenë me opozitën dhe shqiptarët për të ndërtuar këtë qeveri kualitative…Mesazhi i një qeverie të re me koncept të ri dhe me kualitete të reja.”
