Analisti Andi Bushati mendon se Gjykata Kushtetuese dhe Parlamenti janë pjesë e lojës së zvarritjes së procesit lidhur me çështjen e mandatit të deputetes socialiste Olta Xhaçka, e cila akuzohet për konflikt interesi për shpalljen e bashkëshortit të saj, Artan Gaçi si investitor strategjik me vendim të Këshillit të Ministrave.
Duke folur në MCN, Bushati tha që shmangia ose zvarritja e kësaj çështje është një lehtësim i pozitës së të dyshuarës, gjë që Kushtetuesja e ka bërë në disa raste. Për të është pa vlerë që të merret opinioni i Komisionit të Venecias në lidhje me çështjen.
Duke iu referuar PS-së Bushati thotë se është absurde që një bandë të lëshojë anëtarët, prandaj mbrohet Xhaçka.
“Kjo është bërë një lojë qesharake ku duket sikur asnjëri s’do të mbajë përgjegjësinë, as mazhoranca as Gjykata Kushtetuese. Edhe Gjykata Kushteuse edhe Parlamenti janë pjesë e një loje të zvarritjes së procesit. Gjykata Kushtetuese kishte mundësinë ta shqyrtonte çështjen në themel. Këtu turpi është për drejtësinë e re dhe Gjykatën Kushteutese që zgjedh të gjitha mënyrat për dhjetëra çështje që mos i zgjidhë çështjet në themel, t’i shmangi, t’i zvarrisi, dhe ky është një lloj amnistimi i pozitës së atyre që dyshohen si të akuzuar” – tha Bushati.
I pyetur a do shërbente mendimi i Komisionit të Venecias, Bushati thotë:
“Jo. Të mos bëhemi qesharak, me apo pa Venecia, me apo pa Gjykatë Kushtetuese, mandati i Xhaçkës vitin tjetër mbaron. Kemi të bëjmë me një lojë ku fajtore është Gjykata Kushteutese për të zvarritur çështjen. S’mund ta thotë që mandati i Xhaçkës është në rregull, por e len duke zvarrituhtësor çështjen dhe duke e lënë Xhaçkën në Parlament. Edhe truket që t’i drejtohemi Venecias i shërbejnë të njëjtit qëllim. Pse mazhoranca bëri reformën në drejtësi, pse mazhoranca ka kapur SPAK-un dhe GJK? Pikërisht për të mbrojtur njerëzit e saj. Është absurd që një bande me qëllim të caktuar, që të dorëzojë anëtarët e bandës”.
Bushati shprehet se protesta e opozitës, e cila është thirrur nesër, nuk do të prodhojnë gjë.
“Protesta e opozitës s’pres të prodhoj gjë. Deri korrikun e kaluar kishte kuptim që Berisha, njerëzit që e mbështesnin të bënin protesta për të treguar që PD jemi ne. Ç’kuptim do ketë kjo e sotmja kur vula është fituar. Protestat bëhen për të tronditur qeveritë. Ne kemi nga një anë një qeveri që ka mbyllur veshët, dhe një opozitë të pafuqishme për t’u imponuar. Sado e madhe të jetë, nuk e kuptoj qëllimin dhe rezultatin e kësaj proteste. S’jam kundra. Do karikojnë njerëzit e tyre para pushimeve të verës, por për qytetarin e thjeshtë, për ndryshimin e ekuilibrave demokratikë, kam frikë s’e s’do pjellë asgjë. Për mua opozita s’duhet të futet në garën e 4 gushtit, sepse është një garë false, që është e marrë nga Rilindja”.
