Një efektive policie në Komisariatin e Policisë Nr.1, Tiranë, është pezulluar nga detyra gjatë ditës së sotme, dhe është caktuar edhe masa e sigurisë ‘’detyrim paraqitje’’.
Bëhet fjalë për Besie Koshena, e cila gjatë kohës që ka kryer detyrën si Specialiste për Hetimin e Krimeve ka shfrytëzuar atributet e Oficerit të Policisë Gjyqësore, nëpërmjet mashtrimit ka përvetësuar një mjet të sekuestruar dhe në bashkëpunim me shtetasin G.K., e kanë shitur atë për pjesë këmbimi me qëllim përfitimi.
Teksa bashkëpunëtori i saj, Gerti Kurti është caktuar masa e sigurisë ‘’Arrest në shtëpi’’
Njoftimi i policisë:
Tiranë – Vijon procesi i vetëpastrimit të Policisë së Shtetit/ Pas një hetimi të thelluar nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, Agjencia e Mbikëqyrjes Policore ka ekzekutuar masat e sigurimit personal për një oficere policie dhe një shtetas, të dyshuar për kryerjen e veprës penale “Mashtrim”.
Masa e sigurimit “Pezullim nga detyra si punonjëse e Policisë së Shtetit” dhe “Detyrim për paraqitje në Policinë Gjyqësore”, për punonjësen, N/Komisare B.K., 44 vjeçe, efektive në Komisariatin e Policisë Nr.1, Tiranë.
Masa e sigurimit “Arrest në shtëpi” për shtetasin G. K., 35 vjeç.
Nga hetimet e kryera u siguruan prova se punonjësja e policisë B.K., gjatë kohës që ka kryer detyrën si Specialiste për Hetimin e Krimeve, duke shfrytëzuar atributet e Oficerit të Policisë Gjyqësore, pas ekzekutimit të urdhrit për kthimin e mjetit të sekuestruar, nëpërmjet mashtrimit ka përvetësuar atë mjet dhe në bashkëpunim me shtetasin G.K., e kanë shitur atë për pjesë këmbimi me qëllim përfitimi.
