Gjykata e Posaçme ka dhënë këtë të premte vendimin për vazhdimin e masës së sigurisë “Arrest me burg” për 32-vjeçarin Laert Haxhiun, i cili u ekstradua më 3 Korrik nga Greqia përmes pikës kufitare të Kakavijës.
Laert Haxhiu është dënuar me burgim të përjetshëm nga GJKKO për masakrën e Lushnjës të regjistruar në vitin 2017, ku u vranë Zamir Latifi dhe Jurgen Hoxha, por u shpëtoi shënjestra, Xhulio Shkurti, nipi i Aldo Bares, kreu i bandës së Lushnjës. Për të njëjtin atentat janë dënuar me burgim të përjetshëm dhe dy shokët e Haxhiut, Orgest Bilbili dhe Anterio Kaloshi.
Gjithashtu, Laert Haxhiu akuzohet nga SPAK dhe për një sërë krimesh dhe vrasjesh të tjera pas dëshmisë së bashkëpuntorit të drejtëise Artan Tafani, i cili e implikonte në ato ngjarje.
Pas dëshmive të Artan (Marjus) Tafanit, Laert Haxhiu akuzohet si autor i vrasjeve të:
- Lulzim Qorrit, 12 Dhjetor 2018 në Athinë
- Fridmand Xhaferrajt, 13 Maj 2021 në Korçë
- Çajup Selimit, 1 Qershor 2021 në Tepelenë
- Dikens Halilit, 3 Tetor 2021 në Athinë
- Alban Semakut, 17 Tetor 2021 në Peqin
- Albi Bashaliut, 27 Dhjetor 2021 në Elbasan
Si dhe një sërë krimesh të tjera si shpërthime me tritol, tentativë vrasje dhe gjobvënie.
Seancat në GJKKO u bënë të ndara, ndërkohë qe vetë Haxhiu dhe avokati i tij mbrojtës kanë mbajtur qëndrim mohues edhe për masakrën e Lushnjes dhe për dëshmitë e Tafanit, ku ata pretendojnë se nuk kanë njohje me të.
Laert Haxhiu u arrestua në muajin maj të vitit të kaluar në Janinë dhe mbahej në burgun e Koridhalos. Për t’i shpëtuar arrestimit, ai përdorte një leje qëndrimi greke të falsifikuar me emrin Mikis Askalidis, 32 vjeç, lindur në Gjeorgji. Prangosja e Haxhiut u bë pas informacioneve të marra nga nga policia shqiptare e cila ua përcolli ato më pas homologeve grekë.
