Nga Boldnews.al
Në kulmin e metastazave të të vetmit spital publik për trajtimin e sëmundjeve tumorale në vend, ministrja e Shëndetësisë, Albana Koçiu, në vend që të ulte kokën dhe t’u kërkonte falje shqiptarëve për “Onkologjikun” nga foltorja e Kuvendit, lexoi një fjalim të gjatë propagande duke u përpjekur që atë gjysmë zë të zakonshëm ta nxirrte edhe më të fortë.
Edhe pse e re në drejtimin e Shëndetësisë, ministrja nuk mori asnjë përgjegjësi mbi skandalin e “Onkologjikut”, ku ndër vite pacientët nuk kanë marrë trajtimin e duhur për shkak të mungesës së aparaturave, mungesës së medikamenteve, dërgimit të pacientëve për analiza dhe trajtim në spitale private, por tha se faji ka emër dhe le ta mbajnë ata që e kanë bërë. Ministrja e cilësoi ngjarjen si pjesë e mentalitetit shoqëror, që megjithëse e keqe, ajo duhej kthyer në forcë. Por me siguri që teksa lexonte fjalim e parapërgatitur në Kuvend, zonja ministre nga një ish-kryerekrutese e punonjësve në administratën publike, nuk i di ende vështirësitë e pacientëve me sëmundje tumorale, dialize, leucemie etj. Nëse do t’i dinte, do të ishte më e qartë se sa forcë mund të ketë një pacient i prekur nga kanceri për të luftuar me sëmundjen e keqe në trupin e tij, por edhe me një të keqe më të madhe që e pret sa herë shkon në dyert e spitalit.
Çdo vit në Shqipëri identifikohen 6 mijë raste të reja me sëmundje tumorale dhe kjo do duhej të ishte një këmbanë alarmi për qeverinë, ministrinë, që të merreshin masat nisur nga shtimi i buxhetit, duke marrë në konsideratë numrat në rritje dhe nevojat për trajtim.
Referuar raportit të KLSH-së për trajtimin e sëmundjeve tumorale, pesha në buxhet për trajtimin e sëmundjeve tumorale për vitin 2020 ka zënë 11.7%, për vitin 2021 ka zënë 7.4% dhe në vitin 2022 ka zënë 7.9% të shpenzimeve faktike totale të QSUNT.
“Pra, konstatohet se shpenzimet për trajtimin e sëmundjeve tumorale zënë një peshë të vogël në shpenzimet buxhetore që kryen QSUT ‘Nënë Tereza’. Gjithashtu, duhet vënë në dukje se shpenzimet buxhetore nuk kanë ndjekur prirje të rritjes së tyre krahasuar me buxhetin e përgjithshëm të QSUT-së ndër vitet në auditim, por përkundrazi kemi një rënie të konsiderueshme nga 11,7 % në 7, 9% në vitin 2022, ndërkohë që numri i pacientëve të diagnostikuar dhe trajtuar me sëmundje tumorale është në rritje.”- thuhet në auditim.
Ndërkohë që edhe më i rëndë është fakti se Regjistri Kombëtar i Kancerit nuk ka të dhëna në kohë reale të rasteve të reja për ecurinë e sëmundjeve tumorale si dhe vdekjet e shkaktuara nga kanceri. “Mungesa e raporteve të monitorimit dhe vlerësimit, mungesa e të dhënave në kohë reale të sëmundjeve tumorale si dhe mos miratimi i akteve administrative normative, reflektojnë zgjidhje jo plotësisht racionale në përmirësimin e cilësisë së shërbimit shëndetësor, për rritjen e jetëgjatësisë dhe në uljen e mortalitetit të pacientëve me kancer. Vlerësimi i raporteve të monitorimit ndihmon në orientimin dhe përmirësimin e politikave shëndetësor në të ardhmen.” – thotë KLSH.
Në Shqipëri punojnë gjithsej 55 mjekë onkologë, nga të cilët, 24 janë pranë Spitalit Onkologjik, 13 mjekë onkologë pranë spitaleve rajonale ku janë ngritur njësitë e kimioterapive; 3 onkolog pranë Spitalit Universitar “Shefqet Ndroqi” dhe 15 mjekë onkologë janë të shpërndarë pranë spitaleve në rrethe dhe në qendrat shëndetësore në vend.
Spitali Onkologjik ka 79 shtretër, 24 mjekë onkologë dhe 33 infermierë, ku çdo ditë marrin shërbim rreth 80 pacientë me kimioterapi nga e gjithë Shqipëria. Një seancë kimioterapie zgjat 2-4 orë trajtim, në varësi të stadit të sëmundjes. Në spital janë vetëm 19 poltrona për kryerjen e kimioterapive, çka i detyron pacientët dhe familjarët e tyre të presin me orë në korridoret e spitalit, të paguajnë kostot e transportit nga rrethet në Tiranë dhe qëndrimin.
KLSH konstatoi gjatë auditimit në Spitalin Onkologjik në vitin 2022 se trajtimi me “Brakiterapi” nuk ka qenë funksional. Mungesa e brakiterapisë ka sjellë sipas KLSH-së mos trajtimin e 200 pacienteve në vit ose 600 gra paciente nuk e kanë marrë këtë shërbim me radioterapi, duke përbërë faktor risku për shëndetin e tyre. Ndërkohë edhe sot pas 2 vitesh kjo pajisje nuk është vënë ende në punë. Ministrja tha se brenda muajit korrik ajo do të jetë funksionale.
Nëse ministrja e Shëndetësisë do t’i kishte analizuar këto të dhëna, do duhej të kishte turp të ngrinte sytë sot në Parlament dhe jo më zërin. Më së paku ajo nuk do duhej të bënte arroganten që si shkon para opozitës, duke e nxjerr veten keq para shqiptarëve që ça nuk u kanë parë sytë në dyert e Spitalit Onkologjik. Nëse ministrja e Shëndetësisë do t’i kishte analizuar këto të dhëna, ajo do duhej të kishte kuptuar pse pacientët detyrohen t’i drejtohen privatit dhe ky nuk është vetëm faji i mjekëve që njësoj si Kryeministri Rama, i cilësoi fajtor në rolin e gjykatëses. Por edhe nëse ia lem fajin vetëm tre mjekëve të bërë kokë “turku”, ministrja nuk u tha shqiptarëve nëse kishte kryer një kontroll për të verifikuar se sa mjekë të tjerë të Onkologjikut njësoj si Edmond Gashi dhe Alketa Pere i çojnë pacientët për t’i zhvatur në mënyrë të pashpirt deri ditën e fundit të jetës në klinika e spitale private. Ministrja foli për të ardhmen se përmes ndryshimeve ligjore mjekët nuk do të lejohen më që pacientët e “shtetit” t’i kenë edhe te “private”, se rrogat e tyre do të rriten, po ashtu edhe investimet në spitale.
Si ish-drejtuese e Departamentit të Administratës Publike që prej kohës kur PS erdhi në pushtet, zonja Albana Koçiu mendon se propaganda bën punë për vota, por sot, si ministre e Shëndetësisë, ajo duhet të dijë se pacientëve onkologjik propaganda ua rëndon edhe më shumë sëmundjen. Ata duan thjesht trajtim dhe ilaçe të shërohen. Ajo që zonja ministre gënjeu sot në Parlament është si dita me natën me realitetin e çdo dite në Spitalin Onkologjik.
