Ish-ministri i Shëndetësisë, Ilir Beqaj, u arrestua mëngjesin e sotëm. Ekzekutimi i vendimit të Gjykatës së Posaçme nga policia erdhi në kuadër të hetimeve për abuzimet me fondet e donatorëve nga Agjencia Shtetërore që drejtonte Beqaj pas largimit si ministër.
Avokati Arbër Hoxha foli në Ditarin e pasdites në A2 CNN për këtë çështje duke u shprehur se ish-ministri rrezikon shumë pasi dy veprat penale korrupsion dhe fshehje pasurie, janë shumë më të rënda se ajo e shpërdorimit të detyrës për të cilën akuzohet te dosja e “Sterilizimit”.
“Çdo dyshim, aq më tepër në Gjykatën e Posaçme, vështirësojnë pozitën e gjithsecilit. Janë dy beteja për t’u bërë. Në rastin konkret, veprat për të cilat ai dyshohet dhe janë regjistruar, janë shumë herë më të rënda sesa shpërdorimi i detyrës në rastin e dosjes së “Sterilizimit”. Shpërdorimi i detyrës është një vepër që dënohet me gjobë ose deri në 7 vite burgim. Në rastin konkret, dy prej akuzave janë tepër të rënda, nga 4 deri në 12 vite burgim dhe nga 7 deri në 15 vite burgim. Dosja e dytë është shumë më e rëndë sesa dosja e parë.
Nëse do të flisja si jurist, ka disa veprime apo mosveprime që ndikojnë drejtpërdrejtë dhe cenojnë interesat e shqiptarëve, patjetër që shanset për t’u deklaruar i pafajshëm janë shumë të vogla”, tha avokati.
Megjithatë, avokati e mbylli duke thënë se nuk është problemi çfarë ka bërë Beqja, por çfarë është e aftë Prokuroria t’i provojë përpara gjykatës.
