Policia e Elbasanit ka proceduar penalisht qyetarin që ditën e djeshme goditi anëtarin socialist të Këshillit Bashkiak, pas përplasjeve për rritjen e çmimit të ujit të pijshëm.
Nën hetim është vënë shtetasi A. M., 68 vjeç, banues në Elbasan. Ai akuzohet për veprat penale “Kundërshtimi i punonjësit që kryen një detyrë shtetërore ose shërbim publik” dhe “Prishja e qetësisë publike”.
“Ditën e djeshme, në ambientet e një salle ku po zhvillohej mbledhja e këshillit bashkiak, ky shtetas ka prishur qetësinë në sallë duke folur me zë të lartë dhe ka goditur me disa sende, anëtarin e këshillit bashkiak, shtetasin L. R.” – thuhet në njoftimin e autoriteteve policore.
Materialet procedurale i kaluan Prokurorisë së Elbasanit për veprime të mëtejshme.
Mbledhja e Këshillit Bashkiak në Elbasan, ku socialistë miratuan rritjen e çmimit të ujit të pijshëm u shoqërua me tensione dhe përplasje. Para fillimit të mbledhjes u zhvillua një protestë e këshilltarëve të opozitës dhe një grupi qytetarësh elbasanas kundër rritjes së çmimit të ujit të pijshëm. Opozita e bojkotoi procesin e votimit në Këshillin Bashkiak për rritjen e çmimit të ujit të pijshëm dhe e cilësoi si të paligjshëm.
VIDEO/ PS rrit çmimin e ujit në Elbasan, qytetari i revoltuar godet këshilltarin socialist
