Koloneli Dritan Demiraj ka përjashtuar mundësinë e zgjerimit të konfliktit në Lindjen e Mesme, pas paralajmërimit të kryeministrit izraelit Benjamin Netanjahu. Në studion e Ditarit me Bruna Çifligun në A2 CNN, ai tha deklaratat e tij janë më shumë një blof, sesa një mundësi për ta realizuar. Sipas tij Izrali nuk ka fuqi për të përballuar një front të dytë lufte.
“Më shumë një blof sesa një mision që Netanjahu ta realizojë. Kemi parë intensifikim të sulmeve të Hezbollahut. Nga ana tjetër dhe forcat mbrojtëse të Izraelit janë goditur në thellësi të territorit të Libanit. Mos harrojmë që për 9 muaj luftë Izraeli ka 7500 viktima, nuk besoj se ka fuqi për t’u përballuar një front të dytë në veri”.
Kolonel Demiri thekson se qëllimi i vetëm i Netanjahut është mbijetesa politike, pasi ka dështuar në të gjitha betejat me Hezbollahun.
“Qëllimi i Netanjahurt është vetëm një; mbijetesa politike. Në të gjitha betejat e tij ai ka dështuar, të cilën për herë të parë e pranoi sot ku deklaroi që është e pamundur të fshijmë nga faqja e dheut Hamasin. Sot kërkoi haptazi nga vendet myslimane të bashkëpunonin për të kundërvepruar kundër Hamasait dhe Hezbollahut. Izraeli ka dështuar në një konflikt në 2006, një konflikt 34 ditor u mposht në mënyrë të turpshme dhe imagjinoni që ishte një Hezbollah më i vogël ushtarakisht, por bashkëpunimi me Sirinë, Rusinë e ka krijuar një kapacitet shumë herë më të lartë dhe ai nuk vepron më si një grup militant, por është i aftë të ekzekutojë operacione të planëzuara, që po i shohim çdo ditë”.
Sipas Demirit, aftësitë operacionale të Hezbollahut dhe atyre që njihen si aksi i rezistencës janë rritur në mënyrë të frikshme. Izraeli thekson ai, ka qenë i suksesshëm në vrasjen e grave e fëmijëve, por i pasuksesshëm për Hamasin.
“Ushtria izraelite është me kapacitet të larta operacionale, por gjenerata e sotme e luftërave ka ndryshuar. Nuk është vetëm teknologjia që siguron fitoren në betejë. Aftësitë operacionale të Hezbollahut dhe atyre që njihen si aksi i rezistencës janë rritur në mënyrë të frikshme. Mësimet e nxjerra në Ukrainë janë kopjuar nga Hezbollahu. Dhe në bashkëpunim me eksperiencën e fituar në këto 10 vite po transformohet në fuqi asimetrike të Hezbollahut. Izraeli ka qenë i sukseshëm në vrasjen e grave e fëmijëve, por i pasuksesshëm për Hamasin. Ka shkatërruar vetëm 40% të kapaciteteve të Hamasit. Hezbollahu ka krijuar fusha mbrojtëse të sofistikuara ka 7 batalione këmbësorie, 650 bunkerë, 350 depo nëntokësore të gjitha nëntokë me asistencën e forcave speciale të Koresë së Veriut”.
