Gjykata e Tiranës ka publikuar pamjet e kamerave të sigurisë të momentit kur mjeku i spitalit Onkologjik, Edmond Gashi largohet me vrap nga dera e pasme e gjykatës, për të shmangur gazetarët.
Siç shihet edhe në videon e mëposhtme, mjeku pret për disa minuta brenda koridorit të gjykatës dhe më pas ai shfrytëzon hapjen e derës së pasme me kartë nga një punonjëse dhe largohet. Pasi del në ambientet e jashtme të gjykatës, Edmond Gashi ia fut vrapit për t’iu shmangur edhe filmimeve të gazetarëve.
Edmond Gashi doli nga dera e gjykatës, e cila është e autorizuar vetëm për gjyqtarët dhe punonjësit e gjykatës, të cilët e hapin me kartë.
Për këtë “arratisje” të Edmond Gashit, gjykata ia lë fajin Policisë, pasi duhet të ishte kjo e fundit që duhet ta kishte shoqëruar deri tek dera dhe më pas ta merrte tek dera, pasi iu caktua masa e “arrestit shtëpiak”
Edmond Gashi, i cili në përgjime del me nofkën “buldozeri”, është pjesë e mjekëve të cilët kishin krijuar një skemë abuzive të transfermit të pacientëve me kancer drejt klinikave private, duke i operuar në klinikat private madje edhe pa qenë e nevojshme për pacientët.
