Temperaturat e larta që kanë mbizotëruar gjatë ditëve të fundit në vendin tonë kanë sjellë edhe probleme shëndetësore sa u përket fëmijëve. Në pediatrinë e qytetit të Korçës është krijuar një shtim i vizitave, me temperaturë të lartë dhe simptoma gastrointestinale, të cilat sipas shefit të këtij shërbimi nuk janë të zakonshme për muajin qershor.
Mjeku Robert Rado ka treguar për CNA se rritja e temperaturave ka sjellë shtim të vizitave pranë pediatrisë, të cilat arrijnë deri në 70 vizita ditore.
“Periudha që po kalojmë ka sjellë nje shtim të vizitave në shërbimin e pediatrisë. Rastet kanë si shkak rritjen e temperaturave, që nuk janë të zakonshme për muajin qershor.
Gjatë kësaj periudhe kemi paraqitjen në pediatri të fëmijëve kryesisht me temperaturë të lartë dhe simptoma gastrointestinale, të cilat lidhen me rritjen e temperaturave, por edhe disa viruseve në qarkullim, të cilët nuk janë karakteristike për qershorin. Çdo ditë në shërbimin e pediatrisë vizitohen rreth 70 fëmijë.”
Deri më tani, në repartin e infektivit pranë pediatrisë janë të shtruar 7 fëmijë, të cilët kanë pasur simptoma më të rënduara, ndërsa pjesa tjetër marrin terapinë ditore dhe ndiqen më pas nga mjeku i familjes.
“Një pjesë e tyre marrin terapi ditore, por kemi edhe raste më të rënda, me simptoma të vazhdueshme dhe me temperaturë të lartë, të cilat i kemi trajtuar në regjim spitalor.”
Në këto ditë të nxehta të verës, mjeku bën apel drejt prindërve të cilët duhet të jenë shumë të kujdesshëm me fëmijët e tyre.
“Prindërit të mos i lejojnë fëmijët në pikun e vapës të dalin jashtë dhe të jenë të pakontrolluar. Po ashtu prindërit duhet të kenë kujdes për ushqyerjen, hidratimin dhe higjienën e fëmijëve. Në muajt në vazhdim duke pasur parasysh edhe temperaturat në rritje, ne presim shtim të rasteve të fëmijëve me simptoma gastrointestinale dhe temperaturë. Korriku dhe gushti zakonisht kanë shtim të fëmijëve të prekur si nga virozat ashtu edhe nga infeksionet bakteriale, prandaj prindërit duhet të tregojnë kujdes.”
Kujdesi i prindërve ndaj fëmijëve është më i rëndësishmi në këto ditë kur fëmijët janë më të prekurit nga virozat dhe kushtet atmosferike. Fatmirësisht, në Korçë nuk ka pasur raste të rënda të fëmijëve me temperaturë të lartë apo simptoma gastrointenstinale, ndërsa shërbimi në pediatri vijon normalisht ndonëse ka fluks të shtuar të vizitave.
