Plotësimi i vakancave në Këshillin e Lartë të Prokurorisë dhe Këshilli të Lartë Gjyqësor u la në dorë të fatit. Mungesa e konsensusit politik në komisioni ne posaçëm parlamentar bëri që procesi t’i drejtohej lotarisë nëpërmjet hedhjes së goglave.
Në mungesë të një konsensusi mbi kandidatët për dy vakanca në KLGJ dhe dy në KLP, nënkomisioni i posaçëm parlamentar zgjidhjen ia la në dorë fatit.
Zhvillimi i seancave dëgjimore me kandidatët për dy organet drejtuese të sistemit të drejtësisë nuk ndryshoi bindjen e opozitës sa i përkiste procesit.
Dhe kur zgjidhjen ia le në dorë fatit, jo gjithmonë buzëqesh. Shorti për vakancat në KLGJ nxorën fitues Artan Reçin dhe Albenc Tabakun, dy kandidat të cilët gjatë raportimit, nuk morën vëmendjen maksimale të deputetëve, madje njëri ndër tyre ishte edhe kritik ndaj mënyrës së funksionimit të drejtësisë.
Goglat për vakancat në KLP qëlluan të ishin më ndryshe, ku emrat që u përzgjodhën për t’u dërguar si kandidat në seancë plenare ishin Saimir Kola dhe Erind Mërkuri. Kandidati i parë nuk ngjalli interes te deputetët, ndaj të cilit nuk patën asnjë pyetje, ndërsa i dyti, Erind Mërkuri, duket se ishte i preferuari i socialistëve pasi në disa raste e kanë pasur si përfaqësues të Kuvendit në Gjykatë Kushtetuese.
Sipas ligjit për organet e qeverisjes së sistemit të drejtësisë, Kuvendi ka 10 ditë kohë për të votuar listën e kandidatëve, votim i cili kërkon minimalisht 94 vota. Në mungesë të konsensusit politik në sallë, ligji parashikon rishqyrtimin nga e para të listës së kandidatëve për t’iu përcjell sërish seancës për votim.
