Gjykata e Tiranës ka liruar nga burgu shtetasin rus Aleksander Bobovnikov, 57 vjeÇ, i cili u mbajt për dy javë në paraburgim.
Ndërkohë, ky vendimi gjykatës rrëzon edhe Ministrinë e Drejtësisë, e cila kishte dhënë aprovimin për ta ekstraduar në Moskë.
Aleksander Bobovnikov me profesion mjek neurokirurg erdhi në Shqipëri me aeroplan privat nga Gjermania. Ai ishte shpallur në kërkim nga Rusia për mashtrim, pasi ka dalë kundër luftës në Ukrainë dhe njihet si një kritik i Putin.
Në momentin e arrestimit u mësua se ky shtetas ishte i pajisur me dy pasaporta, ruse dhe izraelite.
Ky vendim i Gjykatës së Tiranës erdhi, pasi Ministria e Drejtësisë refuzoi ekstradimin e tij në Rusi.
“Nuk kam ndërmend të iki dhe të pranoj akuzat. Jam i sëmurë me zemër e kam nevojë për trajtim”, tha ai pas arrestimit, teksa ka deklaruar dhe se në Shqipëri kishte ardhur për disa ditë për pushime.
Aleksander Bobovnikov më herët është ndaluar në Firence por gjykata italiane ka ndaluar ekstradimin për shkak të natyrës politike të çështjes për të cilën kërkohej në Rusi.
Vendet e Bashkimit Evropian e kanë refuzuar arrestimin e tij, teksa në të njëjtën linjë mbetet dhe Gjykata e Tiranës, ndryshe nga Ministria e Drejtësisë e drejtuar nga Ulsi Manja.
