Kreu i PD-së, Sali Berisha, pas vendimit të Gjykatës së Apelit, e cila i dha vulën dhe logon e partisë, iu është drejtuar me një mesazh strukturave të forcës së tij politike, duke e konsideruar vendimin e sotëm si një moment të jashtëzakonshëm.
Berisha u kërkon strukturave që tashmë t’u shtrijnë dorën dhe t’u hapin zemrën edhe 100 mijë demokratëve që në zgjedhjet e 14 Majit të vitit të kaluar votuan për grupin e Lulzim Bashës. Ai thotë se kjo është detyra kryesore dhe prova e tyre.
Berisha thekson se është i bindur e besimplotë se në emër të idealeve demokratike, të interesave jetike të vendit do të përmbushin me nder këtë mision.
Mesazhi i Sali Berishës drejtuar strukturave:
Mesazh për te gjithë drejtuesit e Partisë Demokratike të të gjitha niveleve, anëtarësinë tonë! Vendimi i sotëm është një moment jashtëzakonisht i rëndësishëm që t’ju shtrijmë dorën dhe të hapim zemrën edhe për 100 mijë demokrate dhe demokratë e mbështetës të PD që me 14 maj 2023 votuan për Flamurin e PD. Është mision i një rëndësie të veçantë për secilin prej jush që të bëni çdo gjë që keni në dorë që vëllezërit dhe motrat e familjes tonë të madhe politike të kthehen me dinjitet në shtëpinë e tyre. Aktualisht kjo është detyra jonë më kryesore. Kjo është prova jonë. Jam i bindur e besimplotë se në emër të idealeve tona demokratike, të interesave jetike të vendit do të përmbushim me nder këtë mision. O sot o kurrë! Fitore! #sb
