Kryetarja e komanduar e Bashkisë së Himarës, Blerina Bala, ka dhënë dorëheqjen ditën e sotme. Në një letër drejtuar anëtarëve të Këshillit Bashkiak të Himarës, Bala shpjegon se e ka dhënë dorëheqjen për arsye personale.
Kujtojmë se Blerina Bala u emërua më 29 Mars si kryebashkiake e komanduar me 15 vota pro nga 21 anëtarë të Këshillit Bashkiak, pasi kryebashkiaku i zgjedhur Fredi Beleri dhe ai në detyrë Jorgo Goro janë në burg. Ajo ka qenë anëtare e Partisë Socialiste dhe nënkryetare për disa kohë në Bashkinë e Himarës.
Letra e Blerina Balajt:
Të nderuar anëtar të Këshillit Bashkiak Himarë!
Ndjehem e nderuar dhe e privilegjuar që mu dha mundësia të drejtoja Bashkinë Himarë për këtë periudhë aq sa të vështirë dhe të mrekullueshme për mua.
Gjatë kësaj kohe jam përpjekur të punoj me përkushtim dhe e palëkundur, për të trajtuar dhe zgjidhur çështjet që janë paraqitur para meje.
Sidoqoftë për shkaqe personale që kërkojnë kohën dhe vëmendjen time të plotë, me keqardhje ju njoftoj pamundësinë time për të vazhduar detyrën e Kryetares së Bashkisë Himarë që mu besua dhe nga Këshilli Bashkiak Himarë.
Me këtë letër, sot zyrtarisht paraqes dorëheqjen time të parevokueshme nga pozicioni i Kryetares së Bashkisë Himarë.
Dua të shpreh falenderimet dhe mirënjohjen më të thellë stafit të Bashkisë Himarë, Këshillit Bashkiak Himarë dhe cdo banori të Himarës për mbështetjen dhe për vlerat njerëzore që kemi ndarë gjatë kësaj periudhe.
Përulësisht kërkoj të pranoni mirënjohjen time të sinqertë, për bashkëpunimin dhe për cdo gjë që kemi arritur së bashku.
Me respekt, Blerina Bala
