“Hamasi e ka mirëpritur propozimin e armëpushimit në Gaza dhe ne tani presim përgjigjen e Izraelit”.
Kështu deklaroi ministri i Jashtëm egjiptian, Sameh Shoukry , i cili po viziton sot Madridin.
“Propozimi për një armëpushim në Rripin e Gazës dhe një shkëmbim të të burgosurve duhet të pranohet. Deklaratat e para të Hamasit tregojnë se e ka mirëpritur marrëveshjen e propozuar dhe tani ne presim përgjigjen izraelite,” tha Shoukry gjatë një konference për shtyp.
Izraeli ka vazhduar ofensivën e tij brutale në Gaza që nga sulmi i Hamasit më 7 tetor, pavarësisht nga një rezolutë e Këshillit të Sigurimit të OKB-së që kërkon një armëpushim të menjëhershëm.
Rreth 36.400 palestinezë janë vrarë që atëherë në Gaza, shumica dërrmuese gra dhe fëmijë, dhe mbi 82.000 të tjerë janë plagosur, sipas autoriteteve lokale shëndetësore.
Gati tetë muaj pas fillimit të luftës izraelite, zona të gjera të Gazës janë shndërruar në rrënoja, krahas një bllokade gjymtuese të ushqimit, ujit të pastër dhe ilaçeve.
Izraeli akuzohet për gjenocid në Gjykatën Ndërkombëtare të Drejtësisë, e cila në vendimin e saj të fundit e urdhëroi atë të ndalonte menjëherë operacionin e tij në Rafah, ku mbi një milion palestinezë kishin kërkuar strehim nga lufta përpara se të pushtohej.
