Kryeministri i Kosovës, Albin Kurti, ka theksuar rëndësinë e anëtarësimit të Kosovës në NATO, ditën e diel në takimin e bërë me Presidentin Erdogan në Stamboll.
Sipas “CNN Turk” kryeministri Kurti tha se para se të ishte në Stamboll kishte zhvilluar dhe takime të tjera të nivelit të lartë politik dhe zyrtar me Presidentin dhe nëpunës të lartë të shtetit, në Ankara.
Ai tha se kontaktet e tij në Stamboll kishin në fokus bashkëpunimin ekonomik dhe marrëdhëniet tregtare. Duke theksuar se mes Kosovës dhe Turqisë ka lidhje familjare, por edhe historike e kulturore, tashmë dëshiron që këto lidhje të kthehen në përfitime ekonomike.
Në deklaratat e bëra për mediat turke kryeministri shtoi se: “Bashkëpunimi në fushën e sigurisë dhe mbrojtjes vazhdon, Kosova ka blerë pajisje ushtarake nga Turqia dhe ushtarët e Kosovës kanë ardhur për stërvitje në Turqi.”
