Kryeministri Edi Rama ka reaguar në lidhje me puntatën e dytë të emisionin “Report” që do të jepet mbrëmjen e sotme në orën 20:00 në televizionin shtetëror italian RAI 3, ku do të publikojnë fakte të reja për korrupsion dhe lidhjet me krimin të qeverisë shqiptare, teksa pjesë e dokumentarit janë dhe prononcime të vetë kreut të qeverisë shqiptare.
Në një postim në rrjetet sociale, Rama vazhdon me fjalë ofenduese për puntatën e parë të dokumentarit të këtij emisioni, duke i konsideruar informacionet e dhëna si llumra të eksportuara nga kanalet e ujërave të zeza politike e mediatike të Tiranës.
Rama shton më tej se ka rënë dakord me drejtuesit e emisionit që pavarësisht pjesëve të intervistët që do të futen në dokumentar, intervitsa e plotë e pacensuruar, sipas tij, do të publikohet në rrjetet sociale të emisionit “Report”, si dhe në rrjetet e tij sociale.
Rama shkruan se shënjestra e emisionit është Giorgia Meloni, kryeministrja e Italisë, teksa fton ndjekësit që ta shohin, ta dëgjojnë dhe ta gjykojnë vetë.
Reagimi i plotë i kryeministrit Edi Rama:
“VOGLIO BENE A GIORGIO MA VOGLIO DI PIU A LA VERITA”*
SONTE 20:00
“RAI3 Report” bëri para disa javësh një reportazh ku përzieu në të njëjtin kazan prodhimet e sherrit politik italian mbi marrëveshjen Itali-Shqipëri për qendrën e pritjes së tremijë migrantëve në Shëngjin, me llumin e eksportuar nga kanalet e ujërave të zeza politike e mediatike të Tiranës, duke cënuar imazhin e Shqipërisë dhe dinjitetin e shqiptarëve. Dihet “lufta” që pasoi e që u bë temë e mediave italiane pas kundërvënies sime ndaj asaj llumnaje.
Drejtori i programit “Report” iu përgjigj pozitivisht ftesës sime publike drejtuar atij personalisht, për të ballafaquar faktet në sytë e audiencës së RAI3. Ramë dakord, që përveç copave të intervistës së bërë në zyrën time, të cilat ata do t’i marrin e do t’i presin dhe qepin sipas skenarit të tyre (me qëllimin lehtësisht të lexueshëm të vazhdimit të përzierjes në të njëjtin kazan të sherrnajës politike italiane me llumin e eksportuar nga Tirana) intervista e pacensuruar do të publikohet e plotë njëkohësisht në rrjetet sociale të Report, si edhe këtu në këtë faqe.
Sonte në mbrëmje shikoni, dëgjoni e gjykoni vetë, unë s’po bëj asnjë koment. Nesër flasim, këtu jemi prapë
*Kujdes e kam fjalën për Giorgio-n, gazetarin në foto, jo për Giorgia-n, shënjestrën kryesore të “RAI3 Report”
