Nga Boldnews.al
Kontrolli i Lartë i Shtetit rekomandon shkarkimin nga detyra të Kryeinspektorit Ndërtimor të Bashkisë së Durrësit, Dorian Mema, pasi ka evidentuar të paktën 150 raste të shkeljeve të detyrimeve të tij ligjore.
Kontrollorët shtetërorë thonë se Mema, në cilësinë e titullarit, nuk ka vepruar me prishjen e 35 objekteve të paligjshme, me gjobitjen e 97 subjekteve për shkelje të ligjit mbi territorin, si edhe nuk ka kërkuar mbështetje të specializuar për të zbatuar vendimet e prishjes për 17 objekte të tjera.
Të dhënat janë publikuar në Raportin e Auditit Financiar dhe të Përputhshmërisë të zhvilluar nga Kontrolli i Lartë i Shtetit në Bashkinë e Durrësit dhe të përfunduar së fundmi.
Shkeljet e kryeinspektorit ndërtimor
Kontrolli i Lartë i Shtetit i rekomandon kryetares së Bashkisë së Durrësit, Emirjana Sako, zgjidhjen e kontratës së punës me kryeinspektorin Dorian Mema, i cili ushtron këtë funksion që prej 1 janarit 2022.
Në auditimin e KLSH-së, janë konstatuar shkeljet, në mënyrë të përmbledhur;
– Në 35 raste, edhe pse ka procesverbal konstatimi për ndërtime pa leje, të mbajtura nga Inspektorët e terrenit, nga Kryeinspektori i IMT-së nuk është vijuar procedura brenda afatit 10 ditor për nxjerrjen e vendimit për “Prishje e Objektit të Kundërligjshëm” dhe vendimin për “Dënim me Gjobë”, çka ka bërë mosrespektim të afateve të parashikuara në ligj dhe mosvijimin e procedurave për nxjerrjen e vendimeve për subjektet që kanë ndërtuar pa leje ndërtimi për qëllim fitimi.
– Në 94 raste, nga Kryeinspektori i IMT-së nuk është vijuar procedura për nxjerrjen e “Urdhrit të Ekzekutimit për Prishjen e Objektit të Kundërligjshëm“, që do të thotë se objektet e konstatuara të Kundërligjshëm, për të cilat ka një vendim prishje, vijojnë të pa ekzekutuara nga IMT-ja e Bashkisë Durrës, duke u bërë shkaktar i rritjes së numrit të ndërtimeve informale që kalojnë në procesin e legalizimit, ku subjektet kanë përfituar parcela ndërtimore në pronësi publike, në zonat që kanë përparësi zhvillimin e turizmit.
– Në 17 raste nga Kryeinspektori i IMT-së nuk është bërë “Kërkesë për mbështetje” drejtuar Institucioneve ligjzbatuese, në lidhje me ekzekutimin e Urdhrit të Ekzekutimit për prishjen e objektit të kundërligjshëm, çfarë ka bërë që objektet e konstatuara të Kundërligjshëm për të cilat ka një vendim prishje. vijojnë të pa ekzekutuara nga IMT-ja e Bashkisë Durrës,
Masa edhe për inspektorët
Kontrolli i Lartë i Shtetit ka konstatuar shkelje edhe në aktivitetin e disa inspektorëve ndërtimorë, duke rekomanduar masën administrative “vërejtje” për katër prej tyre.
- S. M., me detyrë inspektor nga periudha 17.06.2019, për parregullsitë e konstatuara në 2 raste në zbatimin në terren të lejeve të ndërtimit të miratuara me objekt:
– “Struktura akomoduese dhe shërbimi për promovimin, përpunimin dhe tregtimin e produkteve bujqësore”, miratuar me vendimin Nr.3009, datë 10.03.2022, me zhvillues R.S. dhe V.S., në adresën Lalëz, njësia administrative Ishëm, Durrës.
– “Strukturë banimi 2 kat, shtesë anësore 2 kat dhe shtesë 1 kat mbi objektin ekzistues 1 kat”, miratuar me vendimin Nr. 2736, datë 18/01/2022, me zhvillues B. M., në Lalz, Durrës.
- G. H., me detyrë inspektor i IMT-së, nga periudha 27/12/2017, për parregullsitë e konstatuara në 1 rast në zbatimin në terren të lejeve të ndërtimit të miratuara me objekt:
“Godinë Banimi dhe Shërbimi 2-4 dhe 6 Kate me 1 Kat Nëntokë”, miratuar me vendimin Nr. 3004, datë 10.03.2022, me zhvillues “K.K. 2003”, në adresën lagjja 6, Rruga “Aleksander Goga “, Durrës.
- A. H., me detyrë inspektor i IMT-së, nga periudha 10.5.2021, për parregullsitë e konstatuara në 1 rast në zbatimin në terren të lejeve të ndërtimit të miratuara.
- K. L., me detyrë inspektor i IMT-së, nga periudha 05.05.2014, për lejimin e zhvillimit të ndërtimeve pa u pajisur me leje ndërtimi dhe pa deklaratë paraprake punimesh, në rrugën “Vath Turja”, Durrës
