Në tribunë si spektator-tifoz. Gareth Bale do të jetë gjithashtu sot në “Wembley” për finalen e Ligës së Kampionëve për të mbështetur Real Madrid teksa spanjollët do të kenë përballë Borussia Dortmund.
34-vjeçari uellsiani, i cili fitoi gjithçka me Blancos, duke përfshirë 5 Champions League dhe që doli në pension vitin e kaluar, konfirmoi për shtypin anglez se do të jetë në ndeshje.
“Është mirë që do të jem në stadium si një tifoz i thjeshtë, si një tifoz më shumë i Realit. Do të jem në stadium pa atë presion dhe pritshmëri që jam mësuar kur luaja vetë. Është diçka me të cilën nuk jam mësuar. Do ta shijoj mundësinë pa qenë në atë tenxhere me presion”, shpjegoi uellsiani.
Më pas Bale ka shtuar: “Kur vjen puna te Liga e Kampioneve, Reali ka diçka që nuk e ka asnjë klub tjetër, kundërshtari nuk luan vetëm ndaj lojtarëve por edhe fanellës së rëndë të Real Madrid.”
