Është liruar nga burgu pasditen e kësaj të premte ish-deputeti i Lëvizjes Demokratike të Kosovës, Gani Geci.
Ai ka përfunduar dënimin, ku ishte shpallur fajtor si autor i vrasjes së Ruzhdi Shaqirit, ngjarje kjo e ndodhur mbrëmjen e 4 gushtit 2014 në qendër të Skenderajt.
Gani Geci për shkak të përplasjes verbale me viktimen, ka qenë në gjendje të rëndë mendor dhe ka nxjerr pistoletën duke qëlluar me 4 plumba në drejtim të tij.
Gani Geci dhe i ndjeri Ruzhdi Shaqiri kishin pasur konflikt disa vjeçar.
Pas daljes në liri, ish-deputeti Geci ka thënë se e ka përfunduar burgun siç “e kryejnë burrat”. Ai ka thënë se ka gjëra për të thënë, por ka paralajmëruar se do të flasë pas disa kohësh.
Siç ka pretenduar Geci menjëherë pas daljes nga burgu, janë bërë disa shkelje në rastin e tij nga Ministria e Drejtësisë.
Më 4 qershor 2021, Gani Geci ishte shpallur fajtor nga Gjykata themelore e Mitrovicës për vrasjen e Ruzhdi Shaqirit në gushtin e vitit 2014. Geci ishte dënuar me 3 vite e gjysmë burg.
