Këshilltari i çështjeve ekonomike në Partinë Demokratike, Dorian Teliti ka shpjeguar programin ekonomik me të cilin demokratët do të kërkojnë votën e shqiptarëve.
Teliti shpjegon se programi i PD-së do të synojë taksimin zero për bizneset e vogla. Ai deklaroi se do të rikthehet taksa 10% për të gjithë.
Teliti shprehet se nuk do të bëjnë si Edi Rama që thotë se “biznesi i vogël është i pataksuar dhe andej takson me mijëra biznese, siç janë dhe profesionistët e lirë” dhe shton më tej se 29 mijë prej tyre po falimentojnë dhe po largohen nga Shqipëria.
‘Ne jemi një parti e cila besojmë tek taksat, por do të kemi taksa të ulëta. Do të kemi taksa për të gjithë.
Do të rivendosim atë politikë, e cila ka qenë e suksesshme në vitet 2007-2008 dhe vitet në vazhdim, e cila është politika e taksës së sheshtë.
Ne do të rikthejmë taksën e sheshtë në 10%, tatim fitimin nga 15% që është sot, do të jetë 10 %.
Do të ndalojmë menjëherë taksimin progresiv mbi pagat. Nuk ka më taksa 23 % për trurin dhe mendjen, për njerëzit e aftë, për profesionistët e lirë.
Nuk do të ketë taksim 15% mbi të ardhurat e tjera që krijohen, do të jetë 10%.
Do të kthejmë taksën e sheshtë e cila ishte e suksesshme dhe rriti formalizimin e ekonomisë, sepse sot kemi një ekonomi e cila është e zhytur në informalitet.
Në çdo 100 njësi që tregtohen në sistemin shqiptar, mbi 40 prej tyre janë jashtë sistemit, as nuk tatohen as nuk taksohen.
Me qëllim që të formalizohet ekonomia shqiptare, që të gjithë aktorët të jenë të përfshirë që të gjithë të paguajnë, e të paguajnë pak, do të rikthejmë taksimin e sheshtë.
Ne do të thjeshtojmë sistemin e procedurave, sistemin e gjobave dhe kontrolleve. Nuk do të ketë më taksidarë që vijnë tek dera e biznesit, por tek analiza e rriskut e cila do të bazohet në teknologjinë e informacionit që kontrollohet të bëhen atje ku është e nevojshme.
Ne kemi propozuar dhe një bandë zhvillimore, e cila financon idetë, startupet, zhvillimin, financon projektet e të rinjve dhe të grave.
Do të kemi një strategji zhvillimore dhe instrumente për të financuar këtë strategji, dhe do rikthehemi taksave të ulëta që janë të pranuara nga të gjitha.
Bizneset e vogla me xhiro 180 mijë euro në vit, do të jetë me taksim zero, për bizneset që do të jenë me xhiro deri në 140 milionë lekë të vjetra do të jenë të përjashtuar edhe nga TVSH.
Nuk do të bëjmë si Edi Rama që thotë se, biznesi i vogël është i pataksuar dhe andej takson me mijëra biznese, siç janë dhe profesionistët e lirë, 29 mijë prej tyre po falimentojnë dhe po largohen”- tha Teliti në ‘Syri Digjital’.
