Pasi u fut në grevë urie për 13 ditë, gjendja shëndetësore e të dënuarit Vladimir Hoxhaj në Burgon e Burrelit, është përkeqësuar dhe ai është transportuar në spital
Në një letër dërguar Ministrisë së Drejtësisë, disa ditë më parë, Hoxhaj thekson se transferimi i tij në këtë burg është i padrejtë, pasi fillimisht e kanë tranferuar nga burgu i Peqinit për në Reç të Shkodrës, por aty e kanë mbajtur vetëm 24 orë dhe më pas e kanë transferuar në Burrel.
I dënuari me burgim të përjetshëm deklaronte se ky transferim është i padrejtë dhe se argumenti i dhënë nuk qëndron pasi atje nuk i rrezikohet jeta, siç është një ndër arsyet e transferimit.
Në letrën e tij, Vladimir Hoxhaj akuzon strukturat drejtuese të burgut të Reçit që sipas tij kanë shkelur ligjin disa herë duke futur brenda burgut sende të paligjshme dhe kjo nuk do të ishte e lehtë më pas.
Ai i bënte thirrje Ministrisë së Drejtësisë, Drejtorisë së Përgjithshme të Burgjeve dhe Avokatit të Popullit të reagojnë dhe ta rikthejnë në burgun e Reçit ku ka edhe vëllain si dhe familjen, pasi deklaron se nënën e ka të sëmurë, në të kundërt – thotë ai, do të vijojë grevën e urisë deri në vetëflijim.
