30-vjeçari, Romarjo Alliaj, i shpallur në kërkim është arrestuar paraditen e kësaj të premteje në Vlorë, pasi akzuohet se ka inskenuar një konflikt me armë zjarri.
Ai është dënuar me 1 vite e 5 muaj burg për veprën penale ‘Mashtrimi’. Në bashkëpunim me një shtetas tjetër kanë inskenuar një konflikt me armë zjarri, në aksin rrugor “Vlorë-Levan”.
“Specialistët e Seksionit për Hetimin e Krimeve të Komisariatit të Policisë Vlorë, në vijim të operacioneve për kapjen e shtetasve të shpallur në kërkim, të cilat zhvillohen në kuadër të megaoperacionit “Sundimi i ligjit”, organizuan dhe finalizuan operacionin e koduar “Location 3”, si rezultat i të cilit, në aksin rrugor “Vlorë-Orikum”, u kap shtetasi i shpallur në kërkim kombëtar: Romarjo Alliaj, 30 vjeç, banues në Vlorë.
Gjykata e Shkallës së Parë e Juridiksionit të Përgjithshëm Vlorë, me vendimin e datës 18.12.2023, e ka dënuar 30-vjeçarin, me 1 vit e 5 muaj burgim, për veprën penale “Mashtrimi”.
Në vitin 2019, ky shtetas, në bashkëpunim me një shtetas tjetër (i arrestuar më parë), me anë të mashtrimit, kanë inskenuar një konflikt me armë zjarri, në aksin rrugor “Vlorë-Levan” ”, thuhet në njoftimin e policisë.
Materialet procedurale i kaluan Prokurorisë, për veprime të mëtejshme.
