Policia ka reaguar lidhur me zjarrin e rënë ditën e sotme në spitalin rajonal të Shkodrës. Në reagimin e tyre thuhet se zjarri ka nisur si pasojë e një shkëndije elektrike në bodrumin e spitalit ku janë të instaluara pompat e ujësjellësit.
Më tej bëhet me dije se falë ndërhyrjes së zjarrfikëses, zjarri është shuar, ndërsa raportohet vetëm dëme materiale.
“Rreth orës 19:30, në një dhomë në bodrumin e Spitalit Rajonal Shkodër ku janë të instaluara pompat e ujësjellësit ka rënë zjarr, dyshohet si pasojë e një shkëndije elektrike.
Zjarrfikësit kanë ndërhyrë menjëherë duke shuar zjarrin nga i cili ka vetëm dëme materiale.”- njofton policia.
Grupi hetimor nën drejtimin e Prokurorisë po punon për zbardhjen e plotë të shkakut të rënies së zjarrit.
