Sonte në “Air Albania” (19:00) do të mësohet skuadra kampione e Shqipërisë për sezonin 2023/2024. Partizani dhe Egnatia do të përballen mes tyre në finalen e madhe të “Final 4”.
Rrogozhinasit, të cilët nuk e kanë shijuar kurrë më parë trofeun e kampionit, kërkojnë të shkruajnë historinë, ndërkohë që “Demat” synojnë titullin e dytë radhazi dhe të 18-n në histori.
Nëse ia dalin do të barazonin Dinamon sa u përket titujve kampionë. Ultras Guerrils janë gati të dhurojnë spektakël dhe të mbështesin deri në fund skuadrën e tyre të zemrës.
Me anë të një postimi në faqen zyrtare, tifogrupi i skuadrës kryeqytetase ka publikuar detajet e organizimit për duelin ndaj Egnatias.
Postimi i “Guerrils”:
“Detajet e organizimit:
–Grumbullimi prej orës 15:00 në sheshin para tribunës N.
Do të keni mundësi të pajiseni me bluzat e reja që kushtojnë 1200 lekë. Gjithashtu shalla dhe materiale të tjera tifozerike.
–Hyrja në stadium duhet të jetë për të gjithë minimumi një orë përpara fillimit të ndeshjes. Llogariteni që në orën 18:00 të keni kaluar kontrollet dhe të jeni në vendin tuaj në tribunën N.
Ora 19:00 fillon jehona.
Rregulla:
–Fillon jehona, fillon kënga.
– Të gjithë të pajisur me simbolet e Partizanit ose grupimit dhe në mungesë të tyre mjafton një bluze e kuqe.
-Nuk hidhen sende në fushë, dhe nuk bihet pre e provokimeve nga lojtarë të caktuar.
-Jepi zemër lojtarëve të ekipit në çdo moment.
-Ndiqen udhëzimet e çunave që merren me koreografinë.
-Respektoni orarin e hyrjes, është me rëndësi.
-Mos ndalo këngën“.
