Erbim Fagu nuk do të jetë më trajner i Tiranës. Lajmi që qarkullon prej ditësh, tashmë është zyrtarizuar përmes një njoftimi nga ana e klubit kryeqytetas.
Kështu, Erbim Fagu ndërpret bashkëpunimin me bardheblutë, në përfundim të një sezoni zhgënjyer, i mbyllur jashtë “Final Four”, por me “dhuratën” e marrë nga Egnatia, që mposhti në finalen e Kupës Kukësin (Tirana merr pjesë në Conference League).
Bashkë me Fagun mbyll bashkëpunimin me Tiranën edhe Endri Vrapi, që ishte pjesë e stafit.
Njoftimi i Tiranës:
“FALEMINDERIT ERBIM FAGU 
KF Tirana njofton se ka mbyllur me konsensus bashkëpunimin me trajnerin Erbim Fagu. Klubi i Futbollit Tirana shpreh mirënjohjen e pamatë për teknikun, mbi kontributin e madh që trajneri Fagu ka dhënë gjatë gjithë rrugëtimit si bardheblu dhe njëkohësisht i uron suksese në vazhdimësi.
Faleminderit Erbim për emocionet dhe punën tënde të palodhur! Gjithmonë një vend mes nesh!
FALEMINDERIT ENDRI VRAPI
KF Tirana njofton se zv. trajneri Endri Vrapi dhe klubi vendosën me konsensus për të ndërprerë bashkëpunimin.
Vrapi u bashkua me Tiranën gjatë këtij sezoni, duke qenë ndihmës trajner, teksa klubi e falënderon për punën dhe kontributin me ngjyrat bardh’ e blu, duke i uruar njëkohësisht suksese në karrierën e tij.”
