Gazetari italian i gazetës ‘Repubblica’ i është përgjigjur kryeministrit Edi Rama, i cili sërish u përplas me gazetarët italianë, këtë herë për një shkrim ku ai vetë ‘rrëzon’ marrëveshjen që kishte nënshkruar me kryeministren italiane, Giorgia Meloni për çështjen e kampeve të refugjatëve.
Rama tha se gazetari italian Gerardo Greco e ka cituar me fjalë që nuk i ka thënë kurrë.
Ndërkohë Rama thotë se ‘përsëri përfundoi në kënetën e betejës politike italiane’.
Por gazetari italian, në një reagim për gazetën e tij, thotë se e ka cituar me besnikëri çdo fjalë që ka thënë Edi Rama.
“Është e vërtetë, kryeministri Rama është një mysafir i madh. Kaluam një orë në Tiranë për një kafe.
Kemi folur padyshim për qendrat e emigrantëve në Shqipëri, por edhe për fenë dhe historinë e Shqipërisë.
Në fund të dialogut tonë padyshim që pyeta Ramën nëse mund të shkruaja për këtë dhe ai u përgjigj menjëherë po.
Askush nuk e ka ndërmend ta fusë kryeministrin Rama në kënetën e politikës italiane, por ai vetë pretendon se problemi do të jetë funksionimi i qendrës së Shëngjinit me procedura italiane dhe rregulla europiane.
Thonjëzat dhe kuptimi i bisedës tonë shumë të këndshme është raportuar me besnikëri në pjesë”, shprehet gazetari.
