Analisti Enton Abilekaj, ka komentuar raportimin e kreut të SPAK Altin Dumanit në Komisionin e Ligjeve, të cilin e quajti një seancë që tregon qartë se nuk ekziston shteti.
I ftuar në Syri TV, Abilekaj shtoi se deputetët e PS e humbën pushtetin para tij, përpiqeshin t’i tregonin që nuk po e kontrollojnë.
“Po të marrim këtë seancë do të shikojmë qartësisht se ky është një shtet ‘i shkuar për lesh’, sepse deputetët e Kuvendit mundoheshin t’i sqaronin Dumanit, se nuk janë ata që kontrollojnë Dumanin.
Organi më i lartë, pushteti më i lartë në Shqipëri që kontrollon të gjitha pushtetet i sqaronte pushtetit të tretë po themi… që nuk janë ata që e kontrollojnë.
Por si? Çfarë kontrollojnë ata nëse nuk kontrollojnë Dumanin?
Nëse nuk kontrollojnë SPAK-un? Çfarë? Do thërrasin KLP të japë ajo llogari për Prokurorinë e Posaçme?
E dyta është që këta njerëz që ju ka dhënë votuesi pushtetin për të kontrolluar çdo institucion, për të mbrojtur të drejtat e tyre, për të përfaqësuar të drejtat e tyre, kur i flisnin Dumanit, e humbën pushtetin dhe i flisnin atij sikur ishin të trajtuar nga Dumani në hetim, jo sikur ishin aty për ta pyetur atë.
Dhe gjysma në sallë ishin me konflikt interesi. Të gjithë të hetuar”, tha Abilekaj.
