Katër persona kanë rënë në prangat e policisë për kultivim droge në Mirditë dhe Kurbin.
Në Mirditë janë arrestuar Emilton Kala dhe Klodjan Deda, ndërsa të shpallur në kërkim janë Adrian Zgara alias Ilir Laska alias Ilirian Laska dhe Gazmir Ahmet Lika.
Ndërsa në Kurbin u arestuan Arber Kasmi dhe Skënder Bajraktari dhe u shpall në kërkim Ali Bajraktari.
Gjithashtu, procedohen penalisht për shpërdorim të detyrave, 2 kryetarë fshatrash dhe 1 specialist pyjesh.
“Komisariati i Policisë Mirditë, në kuadër të një hetimi 1-mujor, me metoda proaktive, të kryer në drejtimin e Prokurorisë së Lezhës, goditi një rast të kultivimit të bimëve narkotike, për të cilin u arrestuan në flagrancë shtetasit:
Emilton Kala, 41 vjeç, banues në fshatin Zheje, për veprën penale “Kultivimi i bimëve narkotike”;
Klodjan Deda, 33 vjeç, banues në Laç, me detyrë Operator i Zyrës së Shërbimeve për Qytetarët, në Komisariatin e Policisë Kurbin, pasi dyshohet se duke shpërdoruar detyrën, ka informuar autorët e kësaj veprimtarie kriminale, për lëvizjet e Policisë.
Në vijim të këtij operacioni u shpallën në kërkim bashkëpunëtorët e shtetasit të arrestuar Emilton Kala, shtetasit Adrian Zgara alias Ilir Laska alias Ilirian Laska, 39 vjeç, banues në fshatin Sanxhak dhe Gazmir Ahmet Lika, 33 vjeç, banues në fshatin Vinjollë.
Nga hetimet dyshohet se të tre këta shtetas kanë kultivuar 1900 bimë narkotike dhe 650 fidanë narkotikë (në kubikë), në afërsi të përroit të Karmës, në fshatin Përshqesh.
Gjithashtu, për këtë rast, u referuan materialet në Prokurori, ku nisi procedimi në gjendje të lirë, për veprën penale “Shpërdorimi i detyrës”, për shtetasin P. Ll., 62 vjeç, kryetar i fshatit Përshqesh dhe për shtetasin Gj. L., 58 vjeç, specialist pyjesh në fshatin Orosh.
Në Kurbin, shërbimet e Policisë, gjatë kontrollit të territorit, bazuar dhe në inteligjencën policore, në pyjet e fshatit Shëmri, Kurbin, gjetën 3 parcela ku ishin kultivuar 151 bimë narkotike cannabis sativa.
Si rezultat i hetimeve u identifikuan organizatorët e këtij rasti kultivimi, shtetasit Skënder Bajraktari, 46 vjeç dhe Ali Bajraktari, 35 vjeç, vëllezër, të dy banues në Kurbin. Në vijim u bë e mundur kapja dhe arrestimi i 46-vjeçarit, ndërsa vijon puna për kapjen e shtetasit Ali Bajraktari
Gjithashtu, për këtë rast u referuan materialet në Prokurori, ku nisi procedimi në gjendje të lirë, për veprën penale “Shpërdorimi i detyrës”, për kryetarin e fshatit Shëmri, shtetasin B. K., 52 vjeç.
Më tej, shërbimet e Komisariatit të Policisë Kurbin, në bazë të informacioneve nga inteligjenca policore, në Milot, gjetën disa bimë të tjera narkotike cannabis sativa, si dhe identifikuan dhe vunë në pranga autorin e dyshuar të kultivimit të tyre, shtetasin Arber Kasmi, 24 vjeç.
Megaoperacioni kombëtar “Territor i pastër” vijon.“- njofton policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Lezhë, për veprime të mëtejshme.
