Është arrestuar në Itali një prej të shpallurve në kërkim në kuadër të operacionit të fundit të SPAK të koduar “Revanshi”, ku u lëshuan 50 urdhër-arreste dhe u goditën 7 grupe kriminale, bazuar në bisedat e aplikacionit të përdorur nga krimi “Sky Ecc”.
Burime për mediat bëjnë me dije se në pranga është vënë shtetasi Ilia Ndoka, pjesë e grupit të ish-deputetit socialist Arben Ndoka, edhe ky i fundit i shpallur në kërkim.
Pritet një komunikatë zyrtare në lidhje me arrestimin në Itali të Ilia Ndokës. Në komunikimet e “Sky Ecc” u zbardh se Arben Ndoka kishte rekrutuar vrasës me pagesë për t’i bërë atentat “të fortit” të Niklës, Durim Bamit, pasi dyshonte se ai ishte i përfshirë vrasjen e vëllait të tij Aleksandër Ndoka.
